NAQ kinumeʼk li bʼutʼihaʼ, wankebʼ li qas qiitzʼin kohebʼ saʼ li tenamit Ur. Aʼan jun nimla tenamit ut chʼinaʼusebʼ li ochoch aran. Saʼ li tenamit aʼin, yookebʼ chaq ajwiʼ xloqʼoninkil li pechʼbʼil yos joʼ keʼxbʼaanu chaq Babel. Ebʼ li keʼwank saʼ li tenamit Ur ut Babel moko keʼxloqʼoni ta li Jehobʼa joʼ keʼxbʼaanu laj Noe ut laj Sem.

Ak 350 chihabʼ xnumik li bʼutʼihaʼ naq kikamk laj Noe. Wiibʼ chihabʼ xkamik laj Noe naq kiyoʼlaak li winq li wank saʼ li eetalil. Aj Abrahan xkʼabʼaʼ li winq aʼin ut oxloqʼ chiru li Yos. Laj Abrahan kiwank rikʼin li xjunkabʼal saʼ li tenamit Ur.

Saʼ jun kutan li Jehobʼa kixye re laj Abrahan: ‹Kanabʼ laatenamit ut aayu saʼ li tenamit li tinkʼut chaawu›. Ma kiʼabʼink laj Abrahan chiru li Yos? Ma kixkanabʼ li rochoch? Laj Abrahan kixbʼaanu li kiyeheʼk re xbʼaan li Yos ut junelik kixpaabʼ. Joʼkan naq kixkʼabʼaʼi ramiiw li Yos.

Naq laj Abrahan kiʼelk saʼ li tenamit Ur kixkʼam chirix li xSara, laj Tare ut laj Lot, ralal li ras laj Abrahan. Ut keʼwulak saʼ li tenamit Haran. Saʼ li tenamit aʼin kikamk laj Tare, xyuwaʼ laj Abrahan. Laj Abrahan ut li xjunkabʼal najt wankebʼ chiru li tenamit Ur.

Naq laj Abrahan ut li xjunkabʼal keʼelk saʼ li tenamit Haran keʼwulak Canaan. Naq wankebʼ Canaan, li Jehobʼa kixye re laj Abrahan: ‹Aʼin li naʼaj li tinkʼe rehebʼ laawalal laakʼajol›. Joʼkan naq laj Abrahan kikanaak saʼ li tenamit Canaan.

Li Yos kirosobʼtesi laj Abrahan; kixkʼe naabʼal xkarneer, xketomq ut xmoos. Abʼan laj Abrahan ut xSara maakʼaʼebʼ xkokʼal.

Chirix chi aʼan, li Jehobʼa kixye re laj Abrahan: ‹Laaʼataq xyuwaʼil li kʼiila tenamit›. Naq kiyeheʼk re aʼin, laj Abrahan wank 99 chihabʼ re. Abʼan, chanru teʼwanq xkokʼal wi cheekebʼ chik?