ULERSUUP kingornagut inuit najugaqarfigiligaasa ilaat ateqarpoq Ur. Illoqarfinngorpoq pingaartoq kusanartunik illulik. Inuili guutipilussiortuupput. Aamma Babelimi taamaassimapput. Urimiut Babelimiullu assiginngilaat Noa erneralu Sem, Jehovamik kiffartuussiuartut.

Ukiut 350-it ulersuup kingornagut Noa aalajaatsoq toquvoq. Ukiut marluinnaat tamatuma kingornagut angut assilissami uani takusat inunngorpoq. Guutip taanna inuttut immikkut ittutut isigaa. Abrahamimik ateqarpoq. Ilaqutanilu Urimi najugaqarput.

Ullut ilaanni Jehovap Abraham oqarfigaa: ’Aallarit Urimit eqqarlinnillu, nunamut ilinnut takutitassannut.’ Abrahamip Guuti naalannerpaa Urimilu atoruminartorpassuit qimallugit? Suu. Abrahamilu Guutimut naalattuaannarami taagorneqalerpoq Guutip ikinngutaanik.

Abraham Urimit aallarmat eqqarliisa ilaasa ilagaat. Ataataa Tara, jorngua Lot soorunamilu Abrahamip nulia Sara ilaapput. Kiisami Karanimut pipput, tassanilu Tara toquvoq. Tamanna Urimit ungaseqaaq.

Kingusinnerusukkut Abraham inoqutaalu Karanimit aallarput Kana’anillu nunaa tikillugu. Tassani Jehova oqarpoq: ’Nuna manna kinguaassannut tunniukkumaarpara.’ Abraham Kana’anip nunaani najugaqalerpoq tupernilu ineqarluni.

Guutip Abraham ikiulerpaa savaaterpassuarnik nersutaaterpassuarnillu kiffarpassuarnillu peqalersillugu. Kisianni Saralu qitornaqanngillat.

Abraham 99-inik ukioqalertoq Jehova oqarpoq: ’Neriorsorpakkit inuiaqatigiippassuarnut ataatanngussasutit.’ Tamannali qanoq ililluni pisinnaava, Abraham Saralu qitornartaarnissaminnut utoqqaavallaarmata?