ပူ ၁၃
ယွၤအတံၤသကိး—အၤဘြၤဟၣ် အဂ့ၢ်
ထံလုာ်ဘၢတၢ်ဝံၤအလီၢ်ခံ တၢ်လီၢ်တခါလၢ ပှၤကညီသုးအလီၢ်ဒီး အိၣ်ဝဲဆိးဝဲန့ၣ် မ့ၢ်ဝ့ၢ်အူၢ်လီၤ. ဟဲကဲထီၣ်ဝဲဝ့ၢ်တဝ့ၢ်လၢအအိၣ်ဒီး ဟံၣ်ဒိၣ်ကျိၤထီ, ဝ့ၢ်တဝ့ၢ်လၢပှၤထူးပှၤတီၤအိၣ်အါဂၤန့ၣ်လီၤ. ဘၣ်ဆၣ်, ပှၤဝ့ၢ်ဖိတဖၣ် ဘူၣ်ထီၣ်ဘါထီၣ် ယွၤလၢအကမူၤကမၣ်တဖၣ် န့ၣ်လီၤ. မၤဝဲဒ်သိးလၢ အိၣ်လၢဝ့ၢ်ဘၤဘူၤလိၣ်အခါန့ၣ်လီၤ. ပှၤလၢအအိၣ်လၢ အူၢ်ဒီးဘၤဘူၤလိၣ်တဖၣ်န့ၣ် တမ့ၢ်ဒ်သိးနိအၤ ဒီးအဖိခွါၡ့ၣ်တဖၣ်န့ၣ်ဘၣ်. မ့မ့ၢ်နိအၤဒီးၡ့ၣ်တခီ ဘူၣ်ထီၣ်ဘါထီၣ်ဝဲ ယဟိဝၤတထံၣ်ဃီန့ၣ်လီၤ.
ထံလုာ်ဘၢတၢ်ဝံၤယံာ် ၃၅၀ နံၣ်န့ၣ် နိအၤလၢအအိၣ်ဒီးတၢ်သးတီန့ၣ် သံဝဲလီၤ. ဒီးလၢခံခံနံၣ်န့ၣ်, ပှၤလၢသုထံၣ်အီၤလၢ တၢ်ဂီၤပူၤတဂၤအံၤ အိၣ်ဖျဲၣ်ထီၣ်ဝဲဒၣ်လီၤ. မ့မ့ၢ်အဝဲဒၣ်န့ၣ် မ့ၢ်ပှၤလီၤဆီတဂၤလၢ ကစၢ်ယွၤအဂီၢ်န့ၣ်လီၤ. အမံၤမ့ၢ် အၤဘြၤဟၣ်လီၤ. အၤဘြၤဟၣ်အိၣ်ဝဲဆိးဝဲဒီး အပှၤဟံၣ်ဖိဃီဖိဒ်သိးသိး လၢအူၢ်အပူၤန့ၣ်လီၤ.
ဘၣ်မုၢ်တနံၤန့ၣ် ယဟိဝၤစံးဘၣ် အၤဘြၤဟၣ်လၢ ‘ပာ်တ့ၢ်နဘူးနတံၢ်တဖၣ်လၢဝ့ၢ်အူၢ်ဒီး လဲၤဆူထံကီၢ်တဘ့ၣ်လၢ ယကဒုးနဲၣ်နၤန့ၣ်တက့ၢ်.’ အၤဘြၤဟၣ်န့ၣ် ဒိကနၣ်ယွၤအတၢ်ကတိၤဒီး ပာ်တ့ၢ်ဝဲဝ့ၢ်အူၢ်အတၢ်ထူးတၢ်တီၤခဲလၢာ်ဝံၤ ဟးထီၣ်ဝဲဒၣ်န့ၣ်လီၤ. မ့ၢ်လၢအၤဘြၤဟၣ်ဒိကနၣ် ကစၢ်ယွၤအတၢ်ကတိၤထီဘိအဃိ ဘၣ်တၢ်ကိးအီၤလၢ ယွၤအတံၤသကိးန့ၣ်လီၤ.
ဖဲအၤဘြၤဟၣ်ဟးထီၣ်ဝဲဒၣ်လၢဝ့ၢ်အူၢ်အခါ အဘူးအတံၢ်တနီၤ လဲၤပိာ်ဃုာ်အခံန့ၣ်လီၤ. အပၢ်တ့ရၤလဲၤဃုာ်ဝဲလီၤ. အဖိဒိၣ်လိာ်စ့ၢ်ကီးလဲၤဝဲဒၣ်လီၤ. အၤဘြၤဟၣ်အမါ စၤရါစ့ၢ်ကီးလဲၤဝဲဒၣ်န့ၣ်လီၤ. လၢတၢ်န့ၣ်အဃိ အဝဲသ့ၣ်ခဲလၢာ် ဟဲတုၤဝဲသ့ၣ်လၢ တၢ်လီၢ်လၢဘၣ်တၢ်ကိးအီၤ ဝ့ၢ်ဟၤရၣ်န့ၣ်လီၤ. တ့ရၤသံဖဲတၢ်လီၢ်အဝဲန့ၣ်လီၤ. ဟဲတုၤဝဲသ့ၣ်လၢ တၢ်လီၢ်လၢအယံၤဒိၣ်မးဒီးဝ့ၢ်အူၢ်န့ၣ်လီၤ.
ယံာ်လံတစဲးဒီး အၤဘြၤဟၣ်ဒီးအပှၤဟံၣ်ဖိဃီဖိတဖၣ် ဟးထီၣ်လၢဟၤရၣ်ဝံၤ ဟဲတုၤဝဲသ့ၣ်လၢ ကီၢ်လၢတၢ်ကိးအီၤ ကနၤဧၣ်န့ၣ်လီၤ. ယွၤစံးဘၣ်အီၤ, ‘တၢ်ဖဲအံၤ, မ့ၢ်ကီၢ်တဘ့ၣ်လၢ ယစံးယကဟ့ၣ်နဖိနလံၤသ့ၣ်တဖၣ် န့ၣ်လီၤ.’ အၤဘြၤဟၣ်န့ၣ် သူၣ်ဒဲလၢကနၤဧၣ်ဒီး အိၣ်ဝဲဒၣ်လီၤ.
လၢကစၢ်ယွၤအတၢ်မၤစၢၤအဃိ အၤဘြၤဟၣ်အိၣ်ထီၣ်ဝဲဒီးသိအဖု, ဆၣ်ဖိကီၢ်ဖိအဖုတဖၣ်, ဒီးအကုၢ်အပှၤအါထီၣ်အါအါဂီၢ်ဂီၢ်န့ၣ်လီၤ. ဘၣ်ဆၣ်သနာ်က့ အဝဲဒီးအမါစၤရါန့ၣ် အဖိတအိၣ်နီတဂၤဒံးဘၣ်.
ဖဲအၤဘြၤဟၣ်အသးအိၣ် ၉၉ နံၣ်အခါ ယွၤစံးဘၣ်အီၤ, ‘ယအၢၣ်လီၤအီလီၤနၤလၢ ယကမၤကဲထီၣ်နၤ ပှၤအါကလုာ်အပၢ်န့ၣ်လီၤ.’ ဘၣ်ဆၣ်သနာ်က့ ကဲထီၣ်ဝဲကသ့ဒ်လဲၣ်. အၤဘြၤဟၣ်ဒီးစၤရါန့ၣ် အသးပှၢ်ဝဲသ့ၣ်လံဒီး ဆၢကတီၢ်လၢကအိၣ်ဖျဲၣ်အဖိအဂီၢ်န့ၣ် လဲၤပူၤကွံာ်လံန့ၣ်လီၤ.
