EVANGO limwe eli va ka tungire vantu konyima zoRuhanzo kwa kere nedina Uru. Uru kwa ya kere sitata somulyo unene nomambo gamwe gomawa. Nye vantu vamo ngava karere vakarunga woyimpempa. Oyo yiyo ngava rugana nomoBabeli. Vantu womoUru naBabeli kapi va kere ngwendi Nowa namunwendi Sema, ava va twikilire kukarera Jehova.

Mouhura, apa da pitire po nomvhura 350 konyima zoruhanzo, Nowa gomulimburukwi ta fu. Konyima tupu zonomvhura mbali mugara ogu ono kumona mefano yipo va mu hampurukire. Age kwa kere mugara gokulikerera kwaKarunga. Edina lyendi kwa kere Abirahamu. Age kwa tungire nepata lyendi mositata saUru.

Ezuva limwe Jehova kwa tanterere Abirahamu asi: ‘Tunda moUru nokusiga ekoro lyoge, o ze kosirongo esi ngani ku likida.’ Abirahamu ga limburukwire Karunga nokusiga maruyiga nagenye gomoUru ndi? Yimo, ga yi rugene. Ntani hena morwa Abirahamu nkenye apa nga limburukwa Karunga dogoro ta ya divikwa asi kaume kaKarunga.

Vamwe vemepata lyaAbirahamu kwa zire nendi apa ga tundire moUru. Oguhwe Tera nage va zire. Nasimpumba sendi Roto nage kwa zire. Yimo tupu hena namukadaAbirahamu, Sara, nage kwa zire. Konyima zosiruwo tava ya siki pevango lyedina Harani, apa ga ya fililire Tera. Awo kwa kere ure naUru.

Kutunda opo Abirahamu nembo lyendi tava tundu poHarani nokuwiza kosirongo sedina Kanani. Jehova makura ta tanta asi: ‘Esi yiso sirongo esi ngani pa vana woge.’ Abirahamu kwa kere ngorooro moKanani nokutunga monotenta.

Karunga ta tameke kuvatera Abirahamu makura ta kara noyiunda yoyinene yononzwi noyikorama nayopeke ntani novakereli mafere. Nye age naSara kapi va kere novana wokureta vene.

Abirahamu apa ga kere nomvhura 99, Jehova ta tanta asi: ‘Ame kuna kukutumbwidira asi ove ngo kara guhya gonomuhoko dononzi.’ Nye ngapi omu nayi vhura kuhoroka eyi mokumona asi oAbirahamu naSara va kurupire unene mokuvhura kugwana vana?

Genesis 11:27-32; 12:1-7; 17:1-8, 15-17; 18:9-19.