UMO umupunda uku abantu baile mu kwikala ili ubulobe bwa menda bwasilile walukwitwa ati umusi wa Ule. Walibele musi uucindeme umwali ne maŋanda amo aaweme. Pano abantu abali mulya balukutembela tulesa twa bufi. Efi balukucita na mu Babeli. Abantu abali mu musi wa Ule na Babeli tabali koti ni Noa ne mwana wakwe Syemi, abatwalilile ukupyungila baYehoba.

Mukupelako, palipitile imyaka 350 ili Ubulobe bwa menda bwasilile, Noa umuntu wa bucetekelo alifwile. Palipitile lukoso imyaka yobilo ne mwalalume ulukubona mu cikope alifyelwe. Aali muntu uwalibelele kuli baLesa. Isina lyakwe lyali ni Ablaamu. Alukwikala ne lupwa lwakwe mu musi wa Ule.

Kambi kasuba baYehoba balyebele Ablaamu ati: ‘Ufumeko ku Ule na ku bakwanu, ne kuya ku calo ico ici nkakulangisya.’ Kani Ablaamu alyumfwilile baLesa ne kusya fyonse ifya kusangalasya ifyali mu musi wa Ule? Inya, alyumfwilile. Kabili nipakuti Ablaamu lyonse alukumfwila baLesa eci aisibikilwe ati cibusa ca baLesa.

Bambi abakwabo Ablaamu balile naye ili afumineko ku Ule. Bawisi Ablaamu ba Tela balile naye. Loti umwipwa wakwe naye alile. Kabili Sala umukasi wakwe Ablaamu naye alile. Mukupita kwa mpindi bonse balifikile ku musi uwalukwitwa ati Kalani, eko Tela afwilile. Baali ukutali na ku musi wa Ule.

Ili papitile mpindi Ablaamu ne ba mu ŋanda yakwe balifumineko ku Kalani ne kwisa ku musi uwalukwitwa ati Kanani. Kulya eko baYehoba balabile ati: ‘Ici e calo nkapela ku bana bobe.’ Ablaamu alikele mu Kanani mu masema.

BaLesa balitatikile ukofwa Ablaamu icakweba’ti alikwete amatanga ambelele ne nama simbi ne myanda ya bapyunjisi. Pano ye na Sala tabakwetepo neli mwana uwakulifyalila.

Ili Ablaamu ali ne myaka 99, baYehoba balilabile ati: ‘Nakulaya ati ukalukuli niwe wisibo ifikoto fya bantu ifingi.’ Kani ici cali ne kucitikako syani, pakuti Ablaamu na Sala baalicekwile ukwakuti bafyale umwana?

Ifyakutaŋga 11:27-32; 12:1-7; 17:1-8, 15-17; 18:9-19.