Chihande 13

Apalahama—Sepa lyaKalunga

LIFUCHI limwe vayile nakutwama vatu hanyima yaLivaji lyapwile lifuchi lyaUle. Lyapwile jino hilimbo lyalilemu najizuvo jamwaza. Oloze vatu vapwilemo valemeselenga tulunga vamakuli. Muvalingilenga navatu vamuMbavele. Vatu vamuUle naMbavele kavalifwanyine naNowa namwanenyi Sheme, vaze vazachililenga Yehovako.

Omu hahichile myaka 350 kufuma halivaji, Nowa wakushishika afwile. Hahichile kaha myaka ivali nakusemuka chalunga unakumona hamuvwimbimbi. Apwile mutu wakulipwila kuli Kalunga. Ikiye Apalahama. Atwaminenga natanga yenyi mulifuchi lyaUle.

Likumbi limwe Yehova alwezele Apalahama ngwenyi: ‘Fuma kuUle nakuli vausoko wove, uyenga kulifuchi nangukakulweza.’ Kutala Apalahama ononokele Kalunga nakuseza kuyoya chamwaza chamuUle tahi? Eyo, etavile. Shikaho Apalahama vamuvulukile ngwavo sepa lyaKalunga mwomwo shimbu yosena ononokelenga Kalunga.

Vausoko waApalahama vamwe vayile nenyi hakufuma muUle. Ayile naise Tela. Namwihyawenyi Lote nawa. Kaha Apalahama ayile napuwenyi, Sala. Vahetele kuchihela chaHalane, kuze afwilile Tela. Hapwile hahasuku nakuUle.

Kapyapya kakandende kaha, Apalahama natanga yenyi vafumine muHalane nakuya kulifuchi lyaKanane. Kuze jino Yehova ambile ngwenyi: ‘Eli likiko lifuchi nangukahana vana vove.’ Apalahama atwaminenga mujimbalaka muKanane.

Kalunga aputukile kumukafwa Apalahama ngocho apwile jino namautanga amavulu amikoko natunyama veka namakulukaji avangamba nawa. Oloze kasemene vana kuli Salako.

Apalahama hakuheta myaka 99, Yehova ngwenyi: ‘Ngunalishiki lushiko nayove ngwami mukapwa usevo yavatu vaka-mafuchi amavulu.’ Unwechi chatelele kusoloka ngachilihi, hakuwana nge Apalahama naSala lusemo lwafwile hakushinakajiwa chikuma?

Kuputuka 11:27-32; 12:1-7; 17:1-8, 15-17; 18:9-19.