UR YËˈË tuˈugë lugäär mä ja jäˈäy tsyënääytyaktë ko ja Ayoˈonduu nyajxy. Jyëmbijty mëj käjpn, mä tsyënääytyë kumeeny jyaˈay diˈib myëdäjttë jyëën tyëjkë tsujatypyë. Per ja jäˈäyëty diˈib jam tsënääytyë yëˈë yˈawdäjttë dios diˈib kyaj tyëyˈäjtënëty, dëˈën extëm ja jäˈäy diˈib tsënääytyë Babel. Kyaj tmëduundë Jyobaa extëmë Noˈee mëdë myäänk Sem.

Noˈee ja Dios mëduumbë, jaanëm yˈoˈky 350 jëmëjtëbë nety të nyaxy ja ayoˈonduu. Kyum majtsk jëmëjt ta myaxuˈunkˈäjtyë tyäˈädë jäˈäy diˈib mˈijxypy mä tyäˈädë dibujë. Tyäˈädë yetyëjk mëjë Dios yajnäjxë. Ja txëˈäjty Abra̱a̱n. Jam tsyënääjy Ur mëdë jyiiky myëguˈuk.

Tuˈugë xëë Jyobaa tˈanmääyë Abra̱a̱n: Tukpëtsëëmduˈudë mgäjpn ets mastuˈudë mjiiky mëguˈuk, ets nëjx mä tadë it lugäär diˈib ndukˈixaampy. ¿Myëmëdoojëdaa Abra̱a̱në Dios ets nyikaktääyëdaa tëgekyë diˈibë nety myëdäjtypy Ur? Myëmëdoo. Ets mët ko Abra̱a̱n xëmë tmëmëdooyë Dios ta yaˈixyˈajty extëmë Diosë myëtnaymyaayëbë.

Ko Abra̱a̱n tsyoˈony Ur, ta pyatsoˈonë niduˈuk nimajtskë jyiiky myëguˈuk. Patsoˈonë tyeety, Taree, nandëˈënë tsyojmäänk Lot. Aa, ets nandëˈënë nyëdoˈoxy, Saarʉ. Dëˈën tyuˈudëjkëdë, ets ta ok jyäjttë mä tuˈugë käjpn diˈib xyëˈäjtypy Arán, jamë Taree yˈoˈky. Jagamë nety të wyëˈëmnë Ur.

Ok, ta ja Abra̱a̱n mëdë jyiiky myëguˈuk tsyoˈondë Arán ets jyäjttë mä nyaxë Kanán. Jamë Jyobaa yˈanmääyë: Tyäˈädë dëˈënë naxwinyëdë diˈibëts nmoˈoyaambyë mˈuˈunk mˈënäˈk. Abra̱a̱n ta jam ojts tsyënääywyëˈëmë ets yëˈë tyuktsënäˈäyë witëjk.

Dios kyunuˈxë Abra̱a̱n, ets päätyë netë Abra̱a̱n tmëdäjty kanäk kajpëˈëgë borreegë, etsë wiingatypyë jëyujk animal ets tmëdäjty mëgoˈpxˈamë tyuumbë myosë. Per yëˈë mëdë Saarʉ kyaj nety ti yˈuˈunk.

Ko Abra̱a̱n tmëdäjtyë jyëmëjt 99, ta Jyobaa yˈanmääyë: Mijts mˈuˈunkˈataambyë may nyax may gyäjpn. Per ¿wiˈixën tˈuˈunkˈatëdë may nyax may gyäjpn, ets pën yëˈë mëdë Saarʉ të nety myëjäˈäyëndë etsë yˈuˈunk tpäättët?