MU NIMA ya Livazi, ha kati ka vaze vantu va lisanduokele, vamo va ka tungile ku cihela ci va sana nguavo Ule. Ya puile mbonge imo ya cili cikuma, mua kele vindzivo via cili. Vunoni vantu va tungilemo va kele na ku lemesa vanjambi va makuli. Ngue muze mu va kele na ku linga ku Mbambele. Vantu va ku Ule na Mbambele ka va puile ngue Noa na muaneni Seme, uze ua tualeleho ku pangela Yehova.

Mu nima ya miaka 350 ku fuma ha livazi, Noa ua tsile. Mua hitile miaka ivali kaha ou yala ali aha ha fikula ua semukile. Ua puile muntu ua seho ya kama kuli Njambi. Lizina lieni Avilahama. Ua yoyele na va vusoko vueni mu mbonge ya Ule.

Tangua limo, Yehova ua lekele Avilahama ngueni: ‘Tuhuka mu Ule na va vusoko vuove, kaha ya ku cifuti ci nji ka ku inikila.’ Vuno Avilahama uononokele kuli Njambi na ku tava ku seza muono ua cili mu Ule ni? Eyo ua tavele. Avilahama uononokele kuli Njambi ntsimbu yose, ngeci va mu tantekeyele ku pua ka vusamba ka Njambi.

Vamo va vusoko vua Avilahama va ile neni, mua fumine mu mbonge ya Ule. Ise Tela neni ua ile. Kaha na muihua ueni Lote. Na Sala, mpuevo ya Avilahama ua ile. Kaha vose va ka tulile ku cihela ci va sana nguavo Halane, kukekuo kuze kua ka tsililile Tela. Va ka tungile ku laako na Ule.

Mu nima ya ntsimbu Avilahama na va vusoko vueni va fumine ku Halane na ku alukila ku cifuti ca Kanana. Kaha kuze Yehova ua mu lekele ngueni: ‘Eci cikeco cifuti ci nji ka hana ku vana vove.’ Avilahama ua tungile mu Kanana kaha ua yoyelele mu vimbalaka.

Kaha Njambi ua putukile ku kuasa Avilahama, ua mu vezikisile kaha ua kele na vimuna va vengi na vihita via vangamba. Vunoni ikeye na Sala kava kele na muana na umo uahi.

Omo Avilahama ua puisile miaka 99, Yehova ua handekele neni ngueni: ‘Nji ku kulahesa nguange u kapua ise ya vifuti via vantu.’ Vati eci ce ku lipuisilemo, muomu Avilahama na Sala tele va na kulupa laza, ka va hasa naua ku sema?