Ekitebyo 13

Abrahamu—Munywani wa Ruhanga

GUMWE aha myanya ei abantu baagiire kutuuramu bwanyima y’Omwegyemure gukaba nigwetwa Uri. Gukahinduka orurembo rukuru rurimu amaka marungi. Kwonka abantu omwo bakaba nibaramya baaruhanga b’ebishuba. Ekyo nikyo baabaire bakora n’omuri Babeeli. Abantu omuri Uri na Babeeli bakaba batari nka Noa na n’omutabani Sheemu, abaagumire nibaheereza Yehova.

Aha muheru gw’emyaka 350 bwanyima y’omwegyemure, Noa omwesigwa akafa. Hakahinguraho emyaka ebiri yonka obu omushaija ou orikureeba omu kishushani eki yaazaarwa. Akaba ari omuntu w’omutaano munonga ahari Ruhanga. Eiziina rye akaba naayetwa Abrahamu. Akaba naatuura n’eka ye omuri orwo rurembo rwa Uri.

Eizooba rimwe Yehova akagambira Abrahamu ati: ‘Ruga omuri Uri n’omu banyabuzaare baawe, oze omu nsi ei ndikworeka.’ Abrahamu akabaasa kworobera Ruhanga n’okureka enyima ebirungi byona eby’omuri Uri? Eego, akamworobera. Kandi Abrahamu akamanywa nka munywani wa Ruhanga ahabw’okugira ngu obutoosha akaba ayorobera Ruhanga.

Bamwe aha b’omu ka y’Abrahamu bakagyenda nawe obu yaaruga omuri Uri. Ishe Teera akagyenda nawe. N’omwana w’omurumuna Looti. Kandi na Saara muka Abrahamu akagyenda nawe. Bwanyima y’obunaku kuhinguraho, bakahika omu mwanya ogurikweta Harani, ei Teera yaafeereire. Bakaba bari hare na Uri.

Bwanyima y’akaanya, Abrahamu n’eka ye bakaruga Harani kandi baahika omu nsi erikwetwa Kanaani. Okwo Yehova akagira ati: ‘Egi niyo ensi ei ndiheereza abaana baawe.’ Abrahamu akaguma omuri Kanaani kandi yaatuura omu mahema.

Ruhanga yaatandika kuhwera Abrahamu, yaagira amasyo maingi g’entaama n’agandi matungo hamwe n’abairu baingi. Kwonka we na Saara bakaba bataine abaana baabo ahabwabo.

Abrahamu ku yaahikize emyaka 99 y’obukuru, Yehova yaamugira ati: ‘Ninkuraganisa nti noija kuba Ishe w’amahanga g’abantu baingi.’ Kwonka shi eki kikaba nikiija kubaho kita, obu Abrahamu na Saara baabaire baakuzire batakizaara?

Okutandika 11:27-32; 12:1-7; 17:1-8, 15-17; 18:9-19.