BƐFƐLƐ ɛleka mɔɔ menli hɔdɛnlanle wɔ Azuyilɛ ne anzi la anu ko Yule. Ɔrayɛle suakpole titile mɔɔ ɛnee azua ngɛnlɛma wɔ zo. Noko ɛnee menli mɔɔ wɔ zo la sonle awozonle. Zɔhane ala yɛɛ bɛyɛle ye wɔ Babelɔn noko a. Menli mɔɔ wɔ Yule nee Babelɔn la ɛnee ɛnle kɛ Nowa nee ɔ ra Hyɛm, mɔɔ hɔle zolɛ zonlenle Gyihova la.

Awieleɛ kolaa, wɔ azuyilɛ ne anzi ɛvolɛ 350, nɔhalilɛnli Nowa wule. Ye ɛvolɛ nwiɔ anzi ala a bɛwole nrenya ne mɔɔ ɛnwu ye wɔ nvoninli ɛhye anu la. Ɛnee ɔle sonla titile kpalɛ ɔmaa Nyamenle. Ye duma a le Ebileham. Ɛnee ɔ nee ye abusua ne de suakpole Yule azo.

Kenle ko Gyihova hanle hilele Ebileham kɛ: ‘Ɛvi Yule, wɔ maanle ye anu tu, ye ɛ nwo fi ɛ nwo amra avinli, na kɔ maanle ne mɔɔ mebahile wɔ la anu.’ Asoo Ebileham diele Nyamenle na ɔgyakyile anwodɔlɛ mɔɔ wɔ Yule la amuala ɔ nzi ɔhɔle ɔ? Ɛhɛe, ɔyɛle ye zɔ. Na ɔluakɛ ɛnee dahuu Ebileham tie Nyamenle la ati a bɛravɛlɛle ye Nyamenle agɔnwo a.

Ebileham abusua ne anu amra bie mɔ nee ye hɔle wɔ mekɛ mɔɔ ɛnee ɔlɛvi Yule la. Ɔ ze Tilaa hɔle bie. Yɛɛ ye awozoa Lɔɔto noko. Yɛɛ akee Ebileham aye Sɛla noko hɔle bie. Mekɛ hɔle bie la bɛ muala bɛhɔdwule ɛleka bie mɔɔ bɛfɛlɛ ye Hɛlan, ɛleka mɔɔ Tilaa wule la. Ɛnee bɛ nee Yule avinli twe kpalɛ.

Mekɛ hɔle ekyii la Ebileham nee ye abusua ne vile Hɛlan na bɛrale azɛlɛ ne mɔɔ bɛfɛlɛ ye Keena la azo. Gyihova hanle ye wɔ ɛkɛ ne kɛ: ‘Azɛlɛ mɔɔ mebava meamaa ɛ bo zo amra la ɛne.’ Ebileham dɛnlanle Keena wɔ ɛdanlɛ sua nu.

Nyamenle bɔle ɔ bo kɛ ɔboa Ebileham na ɔranyianle mboane nee nane gyɛne dɔɔnwo yɛɛ ngɛkɛlɛ ɛya ɛya dɔɔnwo. Noko ɛnee ɔ nee Sɛla ɛnlɛ ralɛ.

Mɔɔ Ebileham nyianle ɛvolɛ 99 la, Gyihova hanle kɛ: ‘Mebɔ wɔ ɛwɔkɛ kɛ ɛbayɛ maanle maanle dɔɔnwo bɛ ze.’ Noko ɛnee kɛ ɛhye bazi ara nu, kɛmɔ ɛnee Ebileham nee Sɛla akee ɛnyi somaa kɛ bɛkɛwo ralɛ la ɛ?