MꞌE̱FA de rä Däta däyꞌe, nꞌa de nuꞌu̱ yä luga habu̱ bi ma bä ꞌmu̱i yä jäꞌi, mrä thuhu Ur. Rä hnini Ur bi zo̱ho̱ bi fädi ngu nꞌa rä däta hnini ꞌne mi ja yä ngu xä ñho. Pe nuꞌu̱ yä jäꞌi mi ꞌmu̱hni, mi xo̱kämbeni yä zidada hingä mäjuäni. Geꞌä mi pe̱fi ꞌnehe nuꞌu̱ yä me Babel. Pe rä Noe ꞌne näꞌä rä tꞌu̱ mrä thuhu Sem hingä mi ngu yä me Ur ꞌne yä me Babel, ngeꞌä rä Noe ꞌne rä Sem bi sigi bi me̱päbi Jeoba.

Bi thogi 350 yä je̱ya de nuꞌmu̱ xki nja näꞌä rä däta däyꞌe, ꞌne nubye̱ bi du rä Noe. Yo nje̱ya mꞌe̱fa, bi mꞌu̱i nuni rä jäꞌi gi handi ha rä kꞌoi. Äjuä mi numäñho nuni rä jäꞌi. Mrä thuhu Abraan. Mi ꞌmu̱ ha rä hnini Ur ko gatꞌho rä familia.

Nꞌa rä pa, Jeoba bi ꞌñembäbi rä Abraan: “Tsopu̱ rä hnini Ur ꞌne nuꞌu̱ ri pariente, ꞌne ri ma ha nꞌa rä dähni ma gä utꞌäꞌi”. ¿Bi yꞌo̱de rä Abraan ꞌne bi zogi nuꞌu̱ yä ñho mi ja ha Ur? Hää. Rä Abraan bi zo̱ho̱ bi tꞌembi rä ntsitsꞌi Äjuä ngeꞌä nzäntho mi o̱te Äjuä.

¿Toꞌo bi de̱ni rä Abraan nuꞌmu̱ bi bo̱ni de rä hnini Ur? Rä dada mrä thuhu Tare, rä ꞌme̱dätsi mrä thuhu Lot. ꞌNe rä ꞌme̱hñä rä Abraan mrä thuhu Sara. Mꞌe̱fa gatꞌho bi zo̱ni ha nꞌa rä luga rä thuhu Aran, ꞌnepu̱ rä Tare bi du. Nuyu̱ mi ꞌmu̱i yabu̱ de Ur.

Mꞌe̱fa rä Abraan ꞌne gatꞌho nuꞌu̱ mi ꞌmu̱ ha rä nguu bi bo̱ni de Aran ꞌne bi zo̱ni ha nꞌa rä hai rä thuhu Kanään. Ja gehni Jeoba bi ꞌñembäbi: “Gehnä rä hai ma gä umbäbi ri bätsi”. Rä Abraan bi gohi ha Kanään ꞌne bi mꞌu̱ ha yä ngu de gä dutu.

Äjuä bi mu̱di bi matsꞌi rä Abraan hänge bi me̱ꞌtsi yä däta taxo de gä de̱ti ꞌne märꞌa yä zuꞌue. Bi me̱ꞌtsi yä nthebetho yä ꞌme̱go. Pe rä Abraan ꞌne rä Sara himi pe̱ꞌtsi yä bätsi.

Nuꞌmu̱ rä Abraan bi me̱ꞌtsi 99 yä je̱ya, Jeoba bi ꞌñembäbi: “Di ñätꞌäꞌi ge ma gi ndada de ndunthi yä dähni de gä jäꞌi”. Pe rä Abraan ꞌne rä Sara ya mñä zi däta jäꞌi, nuꞌmu̱, ¿hanja ma xä za xä me̱ꞌtsi nꞌa rä bätsi?