LENYE yetindzawo bantfu labahlala kuyo ngemuva kwaZamcolo kwakunguse-Uri. Yayilidolobha lelikhulu lelinetindlu letinhle. Kodvwa bantfu labebahlala khona bebakhulekela bonkulunkulu bemanga, njengobe bekunjalo naseBhabheli. Bantfu base-Uri nebaseBhabheli bebangafani naNowa nendvodzana yakhe Shemi, labachubeka bakhonta Jehova.

Kwendlula iminyaka lengu-350 ngemuva kwazamcolo, Nowa indvodza leyetsembekile wabese uyafa. Lendvodza loyibonako kulesitfombe yatalwa sekuphele iminyaka lemibili Nowa afile. Beyingumuntfu lokhetseke kakhulu kuNkulunkulu. Ligama layo kwakungu-Abrahama. Abehlala nemndeni wakhe edolobheni lase-Uri.

Ngalelinye lilanga Jehova watsi ku-Abrahama: ‘Phuma e-Uri nasetihlotjeni takho, uye eveni lengitakukhombisa lona.’ Abrahama wamlalela yini Nkulunkulu, futsi washiya emuva konkhe kunetseteka kwase-Uri? Yebo, wamlalela. Watiwa ngekutsi ngumngani waNkulunkulu ngoba abemlalela ngaso sonkhe sikhatsi.

Labanye emndenini wa-Abrahama bahamba naye nakaphuma e-Uri. Labahamba, kwakungubabe wakhe Thera, umshana wakhe Loti, kanye nemfati wakhe Sara. Ekugcineni befika endzaweni lebitwa ngekutsi yiHarani, lapho afela khona Thera. Besebakhashane kakhulu ne-Uri.

Ngekuhamba kwesikhatsi, Abrahama nemndeni wakhe besuka eHarani baya eveni laseKhenani. Sebalapho Jehova watsi: ‘Leli live lengiyawulinika bantfwana bakho.’ Nabefika lapho, bahlala emathendeni.

Nkulunkulu wabusisa Abrahama waba nemhlambi lomkhulu wetimvu, nalenye imfuyo kanye netisebenti letinyenti. Kodvwa bona naSara bebete bantfwana.

Kwatsi Abrahama nase aneminyaka lengu-99 budzala, Jehova watsi: ‘Uyawuba nguyise wetive letinyenti.’ Kepha loku kwakungenteka njani, ngoba Abrahama naSara besebagugile kutsi bangaba nebantfwana?