UR NIGUMBIʼYUU náa nigún gakúwi̱i̱n xa̱bu̱, nda̱wa̱á rí nixnúu Ruʼwambiiʼ. Ur ni̱jkha̱nú ninindxu̱u̱ mbá xuajin rí nigiʼdoo numuu ma̱ngaa nirígá guʼwá mitsaan. Mú xa̱bu̱ bi̱ nikúwi̱i̱n ikhí ndiyamajkún dios bi̱ ragájkhun. Rúʼko̱ má e̱ni̱ náa Babel ma̱ngaa. Xa̱bu̱ náa Ur ga̱jma̱a̱ náa Babel na̱nguá ninindxu̱ún xóo Noé ga̱jma̱a̱ a̱ʼdióo Sem, ikhiin ni̱ni̱ má xúʼko̱ ñajunʼ Jeobá.

Nikháñu Noé xa̱bu̱ jmbi 350 tsiguʼ nda̱wa̱á rí nixnúu ruʼwambiiʼ. Káaʼ a̱jma̱ tsiguʼ nda̱wa̱á nixtáa xa̱bu̱ bi̱ natayáá náa kiʼniriyaʼ. Ninindxu̱u̱ mbáa xa̱bu̱ kiejunʼ náa inuu Dios. Nigumbiʼyuu Abrahán. Nixtáa náa xuajin Ur gajmíi̱n bi̱ kuwa náa goʼwóo.

Mbóo mbiʼi Jeobá niʼthúu̱n Abrahán: ‹Atatsíñaʼ Ur gajmiáanʼ a̱ngia̱anʼ, ma̱ngoo ayuʼ náa mbá xuajin rí ikhúúnʼ gásngajmáʼ›. Lá niʼnimbo̱o̱ Abrahán rí niʼthúu̱n Dios rí maniñuʼ xúgíʼ rí gíʼdoo náa xuajin Ur ráʼ. Xúʼko̱ kaʼnii. Numuu rí Abrahán niʼnimbo̱o̱ má xúʼko̱ kaʼyoo Dios ikha jngó ni̱jkha̱nú nijmaʼniiʼ bi̱ nimbáxu̱u̱ májánʼ ga̱jma̱a̱ Dios.

Índo̱ rí Abrahán nigájnuu náa Ur ni̱jkha̱ gajmíi̱n tikhun bi̱ kuwa náa goʼwóo. Taré anu̱u̱ nigájnuu. Ma̱ngaa Lot dríxio̱o̱ Abrahán. Ma̱ngaa má Sara, a̱ʼgiu̱u̱. Nda̱wa̱á xúgínʼ niguáʼnu náa mbaaʼ rí mbiʼyuu Harán, náa nikháñu Taré. Mitsinguánʼ niguanúu xuajin Ur náa ikhiin.

Nda̱wa̱á Abrahán gajmíi̱n bi̱ kuwa náa goʼwóo nigájnun náa Harán niguánu náa ku̱ba̱ʼ rí mbiʼyuu Canaán. Ikhí Jeobá niʼthí: ‹Ku̱ba̱ʼ rígi̱ maxnu̱u̱n ejñaʼ›. Abrahán niguanúu náa Canaán ma̱ngoo nixtáa náa guʼwá xtíin.

Dios nigíʼdu̱u̱ nimbáyúu Abrahán ma̱ngaa ni̱jkha̱nú nigiʼdiin mbaʼin wéñuʼ mugu̱ mangiin eʼwíínʼ xujkhúʼ xúʼko̱ má mbaʼin xa̱bu̱ bi̱ numbayíí. Mú ikhaa ga̱jma̱a̱ Sara raguaʼdiin e̱jñún.

Índo̱ rí Abrahán nigiʼdoo 99 tsiguʼ, Jeobá niʼthúu̱n: ‹Nakuʼdáminaʼ rí manindxa̱ʼ anu̱ún xa̱bu̱ náa mbaʼa xuajin›. Mú, xú káʼnii lá gándoo marigá rígi̱, rí Abrahán ga̱jma̱a̱ Sara ni̱ndxu̱ún xa̱bu̱ wanii dí ní rakáʼnii muguaʼdáá mbáa ada̱ ráʼ.