ANTA niku na ankgolh tawilakgoy kristianos akxni xtitaxtunitta Munkaklat xwanikan Ur. Ur lu lanka kachikin xwanit, xʼanan xalakswan chiki. Pero wantiku anta xwilakgolh xkakninanikgoy dioses tiku nixaxlikana. Chuna la xtlawakgoy anta kBabel. Tiku anta xwilakgolh kʼUr chu kBabel ni xkakninanikgoy Dios ni lakomo Noé chu xkgawasa Sem wantiku nikxni makgxtakgkgolh Jehová.

Alistalh, 350 kata akxni xtitaxtunitta munkaklat, Noé xatlan chixku nilh. Kaj akgtiy kata titaxtulh lakachilh uma chixku tiku akxilhpat unu kdibujo. Xlakatin Dios uma chixku tanu xwanit ni lakomo amakgapitsin. Xwanikan Abrahán. Akxtum xtawi xfamilia anta kkachikin wanikan Ur.

Akgtum kilhtamaku Jehová wanilh Abrahán: Kamakgxtakgti Ur chu minparientes, chu kapit kʼakgtum lanka kachikin niku nakmasiyaniyan. ¿Kgalhakgaxmatli Dios chu makgxtakgli putum tuku katuwa xatlan xkgalhiy anta kʼUr? Chuna tlawalh. Xlakata Abrahán putum kilhtamaku xkgalhakgaxmatni Dios, wa xlakata lilakgapaska xʼamigo Dios.

Makgapitsi xfamilia na taʼankgolh akxni taxtulh kʼUr. Xtlat wanikan Taré na taʼalh. Chu xpuxnimat Lot naʼalh. Chu taʼalh xpuskat, xtukuwani Sara. Titaxtulh kilhtamaku chankgolh anta kkachikin wanikan Harán, chu Taré anta nilh. Nialh lakatsu kʼUr xwilakgolh.

Alistalh Abrahán chu Sara chu xfamilia taxtukgocha kHarán chu chankgolh kkachikin niku xwanikan Canaán. Anta Jehová wanilh: Uma katiyatni wa nakkamaxki minkamanan. Abrahán tamakgxtakgli anta kCanaán chu anta xtawilay kchiki nema kaj xuwa xlitlawanit.

Dios tsukulh makgtayay Abrahán chu lhuwa borrego kgalilh, chu amakgapitsi animales chu akglhuwa ciento kskujnanin. Pero Abrahán chu Sara nixkgalhikgoy xkamankan.

Akxni Abrahán xkgalhiy 99 xkata Jehová wanilh: Kmaxkiman kintachuwin pi xatlat xalak lanka kachikinin nawana. Pero, ¿la chuna xkgantaxtulh? Abrahán chu Sara lu lakgkgolotsin xwankgonit xlakata tlan xkgalhikgolh chatum kgawasa.