GINWE ga matshamu laha vanhu va nga ya aka kona anzhako ka Ntalo gi wa vitwa a ku i Ure. Gi mahile doropa ga lisima gi nga hi ni miti ya yi nene. Kanilezi a vaaki va gona va wa khozela vanungungulu va mawunwa. Hizalezo va nga zi maha le Babeli. Le Ure ni le Babeli a vanhu va wa nga fani na Noa ni n’wana wakwe Xemi, va nga simama ku tirela Jehova.

Hi kugumesa, 350 wa malembe anzhako ka ntalo, Noa, munhu wo tsumbeka, i lofa. Anzhako ka malembe mambiri ntsena, ku lo pswaliwa wanuna loyi u mu wonako laha ka mufananiso lowu. I wa hi munhu wo hlawuleka nguvu ka Nungungulu. Vito gakwe ku wa hi Abrahama. I hanyile ni ngango wakwe ka doropa lego ga Ure.

Ginwani siku Jehova i te ngalo ka Abrahama: ‘Suka Ure ni le maxakeni ya wena, uya tikweni legi nzi ta nga ku komba.’ Xana Abrahama i ingisile Nungungulu a tsika kontlhe kutshamiseka ka le Ure? Ina, i ingisile. Kota lezi Abrahama a nga ingisa Nungungulu xontlhe xikhati, i lo tiviwa kota munghana wa Nungungulu.

Vo kari ngangweni wa Abrahama va fambile zinwe naye loku a sukile hi le Ure. Tera, raru wakwe, na yenawu. Loti, zukulu wakwe, i mahilewo lezo. Handle ko kanakana, na Sara, sati wa Abrahama, i yilewo. Hi kufamba ka xikhati va lo chikela ka wutshamu gi vitwako Harani, laha Tera a nga fela kona. Vona va wa hi kule ni Ure.

Anzhako ka xikhatanyana Abrahama ni ngango wakwe va lo suka Harani vaya tikweni gi vitwako Kanani. Na va hi lomo Jehova i te ngalo: ‘Legi hi gona a tiko nzi to nyika vana va wena.’ Abrahama i lo tshama Kanani a hanya matendeni.

Nungungulu i lo sangula ku vuna Abrahama. Na yena i lova ni mitlhambi ya hombe ya tiyivu ni zinwani zihari ni mazana ya zitiri. Kanilezi yena na Sara va wa nga hi na n’wana.

Laha Abrahama a nga hi ni 99 wa malembe, Jehova i te ngalo: ‘Nza tsumbisa lezaku wena u ta maha raru wa matiko manyingi ni vanhu.’ Kanilezi zi wa ta mahekisa kuyini lezo zilo, hakuva Abrahama na Sara va wa khosahele nguvu kasi kuva ni n’wana?