УР суг халавының соонда кижилерниң көжүп келген черлериниң бирээзи турган. Ол чараш бажыңнарлыг чугула хоорай апарган. Ындыг болза-даа Урнуң чурттакчылары меге бурганнарга чүдүп турганнар. Олар Вавилоннуң чурттакчылары-биле дөмей алдынып турганнар. Иеговага бараалгаарын уламчылап чораан Ной болгаш ооң оглу Симге, Ур биле Вавило́ннуң чурттакчылары дөмей эвес болган.

Суг халавының соонда 350 чыл эрткенде, шынчы Ной өлген. Ооң соонда таптыг-ла ийи чыл эрткенде, чурукта чураан кижи төрүттүнүп келген. Бурган аңаа дыка ынак турган. Ол кижиниң адын Авраа́м дээр турган. Ур хоорайга ол өг-бүлези-биле кады чурттап чораан.

Бир катап Иегова Авраа́мга: ‘Урну база төрелдериңни каггаш, мээң айытканым чуртче үнүвүт’,— дээн. Авраа́м Бурганны дыңнааш, У́рнуң бай-чаагай чуртталгазын каапкан бе? Ийе — шак-ла ынчалдыр ол кылган. Авраа́м үргүлчү Бурганга дыңнангыр чораан болгаш, ол Бурганның өңнүү кылдыр билдингир апарган.

Авраа́м-биле кады Урдан ооң каш төрели үнүпкен. Ооң ачазы Фарра. База ооң чээни Лот. Авраа́мның кадайы Сарра база кады үнүпкени чугаажок. Элээн үе эрткенде олар Харран деп черге келгеннер, аңаа Фарра мөчээн. Олар У́рдан ырак турган.

Удаваанда Авраа́м өг-бүлези-биле кады Харранны каггаш, Ханаа́н деп черже чорупканнар. Аңаа Иегова мынча дээн: ‘Сээң ажы-төлүңге бээр черим бо’. Авраа́м Ханаа́нга арткаш, майгыннарга чурттап турган.

Бурган Авраа́мга дузалажып турган: ол улуг кодан хойларлыг база өске-даа дириг амытаннарлыг болгаш каш чүс чалчалыг апарган. Ынчалза-даа Авраа́м биле Са́рраның ажы-төлү чок турган.

Авраа́м 99 харлыг турда, Иегова ону бүзүреткен: ‘Сен хөй чоннарның адазы апаар сен — мен аазап тур мен’. Ынчалза-даа Авраа́м-биле Са́рра ажы-төлдүг апаар-хире эвес хөлчок кыраан болганда, бо чүүл канчап болдуна бээрил?