JUN lum ti bu bat nakiikuk li krixchanoetik kʼalal echʼ li Nojelal ta voʼe, jaʼ sbi Ur. Li Ure kʼataj ta jun lum ti lek ojtikinbil xchiʼuk ti alakʼ sba li naetik te pasbile. Pe li krixchanoetik tee, naka jecheʼ diosetik ta smuyubtaik. Jech tspasik li ta Babel eke. Li krixchanoetik ta Ur xchiʼuk li ta Babele mu xkoʼolajik kʼuchaʼal Noé xchiʼuk Sem, li skerem Noee, yuʼun li stukike muʼyuk la jyiktaik ta spasbel yabtel ti Jeovae.

Ta slajebal ne, cham li tukʼil Noé kʼalal echʼem xaʼox 350 jabil yechʼel li Nojelal ta voʼe. Chib xaʼox jabil xchamel Noé kʼalal vokʼ li vinik ti cha vil liʼ ta lokʼole. Ta sat Diose jaʼ jun vinik ti mu xkoʼolaj ta yantike. Jaʼ sbi Abraham. Te nakal ta Ur xchiʼuk yutsʼ yalal.

Jun kʼakʼal ti Abrahame xi albat yuʼun ti Jeovae: Komtsano li Ure xchiʼuk li avutsʼ avalale, batan ta jun mukʼta lum ti bu chkakʼbot avile. ¿Mi la xchʼunbe smantal Dios xchiʼuk la jyikta skotol li kʼusitik lek ta steklumal Ure? Laj. Ta skoj ti yuʼun la xchʼunbe smantal Dios ti Abrahame la jyichʼ ojtikinel kʼuchaʼal yamigo Dios.

Kʼalal la jyikta Ur ti Abrahame ilokʼ batel xchiʼuk jlom yutsʼ yalaltak. Taré, li stot Abrahame, lokʼ batel ek. Xchiʼuk Lot, li xjunichʼone. Jech noxtok, Sara, li yajnil Abrahame lokʼ batel ek. Ta sjalil ne skotolik kʼot nakiikuk ta steklumal Harán, vaʼun ti Taré ne icham. Toj nom oyik li ta slumal Ure.

Ta tsʼakal ne li Abraham xchiʼuk yutsʼ yalale lokʼik batel ta Harán, kʼot nakiikuk ta yosilal Canaán. Te ne, xi albat yuʼun Jeova ti Abrahame: Liʼe jaʼ li balumil ta xkakʼbe anichʼnabtake. Te naki ta Canaán ti Abrahame, naki ta karpanaetik.

Lik koltaatuk yuʼun Dios ti Abrahame, epaj xchijtak, stsʼunbol chontak xchiʼuk ta sienal noʼox yajtuneltak. Pe ti Abraham xchiʼuk Sarae muʼyuk yalab xnichʼnabik.

Kʼalal yichʼoj xaʼox 99 jabil ti Abrahame xi albat yuʼun ti Jeovae: Ta melel ta xkalbot ti cha kʼot ta totil yuʼun epal krixchanoetike. Pe sventa chkʼot ta pasel taje, ti Abraham xchiʼuk Sarae skʼan xil jun yolik, pe ¿kʼuxi ta xil yolik ti malubemik xa ne?