Huṅwe ha fhethu he vhathu vha dzula hone nga murahu ha Maḓi Mahulu ho vha hu tshi pfi Uri. Ho vha muḓi muhulwane we wa vha u na mahaya avhuḓi khawo. Fhedzi vhathu vha henefho vho rabela midzimu i sili u fana na Babele. Vhathu vha Uri na Babele vho vha vha sa ngi Noaxe na murwa wawe Semu, vhe vha ḓi shumela Yehova.

Mafheleloni, miṅwaha ya 350 nga murahu ha maḓi mahulu, Noaxe a fa. Ho vha miṅwaha mivhili fhedzi nga murahu he munna ane na mu vhona tshifanyisoni a bebwa. O vha e muthu o khetheaho kha Mudzimu, a tshi pfi Abrahamu. O vha a tshi dzula Uri na muṱa wawe.

Ḽiṅwe ḓuvha Yehova a vhudza Abrahamu: ‘Sia Uri na mashaka au, u ye shangoni ḽine nda ḓo u sumbedza.’ Naa Abrahamu o thetshelesa Mudzimu a sia zwithu zwoṱhe zwavhuḓi zwa Uri? Ee, o thetshelesa. Abrahamu o ḓivhiwa sa khonani ya Mudzimu nge a vha a tshi thetshelesa Mudzimu.

Vhaṅwe vha muṱa wa Abrahamu vho ṱuwa nae a tshi ṱuwa Uri. Khotsi awe Thara a ṱuwa. Na ṅwana wa murathu wawe Loto. Vhukuma, na musadzi wa Abrahamu, Sara a ṱuwa-vho. Tshifhinga tshi tshi ḓi ya vha swika fhethuni hu no pfi Harani, he Thara a fa.

Nga murahunyana Abrahamu na muṱa wawe vha ṱuwa Harani vha ḓa shangoni ḽi no pfi Kanana. Henefho Yehova a ri: ‘Iḽi ndi shango ḽine nda ḓo ḽi fha vhana vhau.’ Abrahamu a dzula Kanana a tshi dzula dzidenndeni.

Mudzimu a thoma u thusa Abrahamu lwe a vha na miṱambi mihulu ya nngu na zwiṅwe zwipuka na maḓana a vhaḓinḓa. Fhedzi ene na Sara vho vha vha si na vhana vhane vha vha vhavho.

Musi Abrahamu e na miṅwaha ya 99, Yehova a ri: ‘Ndi fulufhedzisa uri u ḓo vha khotsi wa tshaka nnzhi dza vhathu.’ Fhedzi izwi zwo vha zwi tshi nga itea hani, samusi Abrahamu na Sara vho vha vho no vha vhahulwanesa uri vha nga vha na ṅwana?

Genesi 11:27-32; 12:1-7; 17:1-8, 15-17; 18:9-19.