Mwaha 13: Abrahamu—Mpatthani a Muluku
NIMOSAA na mapuro yaale atthu yaaronwa aya okhala vattuli va Epula ya Mutaaseke niihaniwa Uri. Muttetthe ola waahikhala wootthuneya, waahikhana ipa sikina sooreera. Masi atthu a opuro ole yaakokhorela amuluku oowoka. Yaari ntoko siisaale saary’aya-tho oBabeli. Atthu a Uri ni a oBabeli khiyaari ntoko Nowee ni mwanawe Semi, yaawo yaavikaninhe omurumeela Yehova.
Wanikisa vaya, iyaakha 350 vattuli va epula ya mutaaseke, oororomeleya Nowee aahikhwa. Ela yiiranen’ye vattuli va iyaakha piili paahi vaavo vaayarinwa awe mulopwana owo onimoona anyu valataratoni-va. Owo aari mutthu a vameekh’awe vanceene wa Muluku. Nsina nawe naari Abrahamu. Owo aakhala ni emusi awe mmuttetthe yoole a Uri.
Nihiku nimosaa Yehova aahimuhimeerya Abrahamu wira: ‘Mukhumee mu Uri ni mwaahiye amusi anyu, nto murowee elapo enrowaaka woothonyeryani.’ Niireke wi Abrahamu aahimwiiwelela Muluku ni khuhiya ottuli opuha wotheene wa Uri? Aayo, owo aahiira siiso. Yaahiiraneya eyo okhala wira Abrahamu okathi wotheene aanimwiiwelela Muluku, nto aahisuweliwa okhala ntoko mpatthani a Muluku.
Akina a emusi ya Abrahamu yaahirowa vamosaa n’uwo vaavo owo vaakhummya awe mu Uri. Tiithi awe Terahi aahimutthara. Siiso-tho musulwaa awe Lothi. Nto, mweephattu, mwaara a Abrahamu Sara aahirowa-tho. Moovira wa okathi otheene aya yaahiphiya nipuro niihaniwa Harani, weiwo Terahi waakhwiiya awe. Awo yaari mapuro oorakamela vanceene ni Uri.
Vattuli va okathi wa vakhaani, Abrahamu ni a etthoko awe yaahikhuma oHarani ni yaahirwa elapo yiihaniwa Kanani. Iwe Yehova aahimmye so: ‘Ela elapo yeeyo miyo kinrowaaka waavaha aniinyu.’ Abrahamu aahimaka oKanani ni aakhala muheemani.
Muluku aahipacerya omukhaliherya Abrahamu, nto owo aahikhalana ipwittipwitthi makoto manceene ni inamaa sikina ni anamuteko imiya sinceene. Masi owo ni Sara khiyaarina anamwane oowaayara aya.
Vaavo Abrahamu vaarina awe iyaakha 99, Yehova aamuleelale so: ‘Natiri aka toowi nyuwo munrowa okhala tiithi a maloko manceene a atthu.’ Masi ela yaarowa wiiraneya sai, vooneyaka wi Abrahamu ni Sara vano yaari oowuuluvalexa wira akhalane mwaana?
Maphattuwelo 11:27-32; 12:1-7; 17:1-8, 15-17; 18:9-19.
Makoho
- Atthu a mukhalelo xeeni yaakhala muttetthe wa Uri?
- Tanii mulopwana ola ori valataratoni, aayariwe silinii ni aakhala wuuwi?
- Exeeni Muluku yaamuleelalya awe ovara Abrahamu?
- Nthowa xeeni Abrahamu iitthaniwa awe okhala mpatthani a Muluku?
- Tanii aaronwe ni Abrahamu vaavo vaahiiya awe muttetthe wa Uri?
- Exeeni Muluku yaamuleelalya awe Abrahamu vaavo vaaphiiya awe elapo ya oKanani?
- Natiri xeeni Muluku ampakenlya awe Abrahamu vaavo aarina awe iyaakha 99?
Makoho oowuncererya
- Musome Maphattuwelo 11:27-32.
Abrahamu ni Lothi yaari mutthu ni xeeni awe? (Maph 11:27)
Nnaamwi vahimmwaka wira Terahi taakunxe amusi awe arowaka oKanani, ninsuwela sai wira mwekeekhai aari Abrahamu yoowo aapacerinhe mukwaha woothaama, ni iirenleni siiso? (Maph 11:31; Mit 7:2-4)
- Musome Maphattuwelo 12:1-7.
Moota xeeni Yehova ancerenrya awe wataana wawe ni Abrahamu nuumala Abrahamu ophiya elapo ya oKanani? (Maph 12:7)
- Musome Maphattuwelo 17:1-8, 15-17.
Nsina xeeni nikina Abramu naavahiwa awe vaavo vaarina awe iyaakha 99, nto nthowa xeeni? (Maph 17:5)
Mareeliho xeeni a muhoolo Yehova aamuleihenrya awe Sara? (Maph 17:15, 16)
- Musome Maphattuwelo 18:9-19.
Mu Maphattuwelo 18:19, miritti xeeni sinivahiwa aya axitiithi? (Otum 6:6, 7; aEf 6:4)
Yoowiiraneya xeeni ya Sara enooniherya wira khinniwerya onvitherya etthu Yehova? (Maph 18:12, 15; Sal 44:22)
