USA han mga lugar nga gin-ukyan han mga tawo katapos han Baha amo an Ur. Nagin mainuswagon ito nga syudad nga may-ada mag-opay nga balay. Kondi an mga tawo didto nagsisingba ha palso nga mga dios, pariho han ira ginbuhat hadto ha Babel. An mga tawo ha Ur ngan Babel diri pariho kan Noe ngan ha iya anak nga hi Sem nga nagpadayon ha pag-alagad kan Jehova.

Paglabay hin 350 ka tuig katapos han baha, namatay an matinumanon nga hi Noe. Katapos hin duha la ka tuig, natawo an lalaki nga imo nakikita dinhi hini nga retrato. Hinigugma gud hiya han Dios. Abraham an iya ngaran. Naukoy hiya kaupod han iya pamilya ha syudad han Ur.

Usa ka adlaw, hi Jehova nagsiring kan Abraham: ‘Bayai an Ur ngan an imo mga paryente, ngan kadto ha lugar nga akon ipapakita ha imo.’ Ginsunod ba ni Abraham an Dios ngan ginbayaan an komportable ngan riko nga syudad han Ur? Oo. Ngan tungod kay nasunod pirme hi Abraham ha Dios, nakilala hiya sugad nga sangkay han Dios.

An iba nga kapamilya ni Abraham inupod ha iya han binaya hiya ha Ur. Inupod an iya tatay nga hi Tera, ngan an iya umangkon nga hi Lot. Syempre, inupod liwat an asawa ni Abraham nga hi Sara. Waray pag-iha, inabot hira ngatanan ha lugar nga tinatawag nga Haran, ngan didto namatay hi Tera. Hirayo na hira ha Ur.

Katapos, binaya hi Abraham ngan an iya pamilya ha Haran ngan binalhin ha tuna han Kanaan. Didto hi Jehova nagsiring: ‘Ini an tuna nga akon ihahatag ha imo mga anak.’ Nag-ukoy hi Abraham ha mga tolda ha Kanaan.

Ginbendisyonan han Dios hi Abraham salit nagdamu an iya kakarnerohan ngan iba nga mga hayop ngan nagkaada liwat hiya hin ginatos nga surugoon. Kondi waray anak hira ni Sara.

Han 99 anyos hi Abraham, hi Jehova nagsiring: ‘Nagsasaad ako nga magigin amay ka han damu nga nasud.’ Kondi paonan-o ini mahitatabo, nga lagas na man hira Abraham ngan Sara para magkaanak?