MALO gane gaŵapite ŵandu kuja kutama pacamasile cikumba gakolanjikwaga kuti Uli. Waliji msinda wambone wakola nyumba syakusalala. Nambo ŵandu kweleko ŵalambilaga milungu jaunami. Yeleyo ni yaŵatendagasoni ŵandu ku Babelo. Ŵandu ŵa ku Uli ni ku Babelo nganaŵa mpela mwaŵaŵelele Nowa ni mwanace jwakwe Semu, ŵaŵajendelecele kumtumicila Mlungu.

Kaneko pali papite yaka 350 citendecele cikumba, mundu jwakulupicika jula Nowa ŵajasice. Yagambile kupita yaka yiŵili kutyocela pandaŵiji, nikupagwaga mundu jwakum’wona paciwulilipa. Jwalakweju ŵaliji mundu jwakusosekwa mnope kwa Mlungu. Lina lyakwe lyaliji Abulahamu. Ŵatamaga yimpepe ni liŵasa lyakwe mu msinda wa Uli.

Lisiku line Yehofa ŵamsalile Abulahamu kuti: ‘Mtyoce ku Uli, mwalece acanasi ŵenu, mjawule ku cilambo cacinamlosye.’ Ana Abulahamu ŵampikanile Mlungu nikuyileka yindu yambone yosope yayaliji mu msinda wa Uli? Elo, ŵampikanile. Ligongo lyakuti Abulahamu ndaŵi syosope ŵampikanilaga Mlungu ŵayikene pakukolanjikwa kuŵa mjakwe jwa Mlungu.

Ŵane mwa ŵandu ŵa mu liŵasa lya Abulahamu ŵatyosile nawo ku Uli. Atati ŵakwe Tela ŵatyosile nawo. Loti juŵaliji cipwa cakwe nombenajo ŵatyosile nawo. Nambosoni Sala juŵaliji ŵamkwakwe Abulahamu ŵatyosile nawo. Pajapite ndaŵi ŵakopocele pamalo gakolanjikwa kuti Halani, kweleko ni kuŵawilile Tela. Ŵaliji ali atalikangene mnope ni ku Uli.

Pajapite ndaŵi panandi Abulahamu ni liŵasa lyakwe ŵatyosile ku Halani nikukopocela ku cilambo cakolanjikwa Kanani. Kweleku Yehofa ŵamsalile Abulahamu kuti: ‘Cilambo celeci cinjicipeleka kwa ŵanace ŵenu.’ Abulahamu ŵatamaga m’matenti ku Kanani.

Mlungu ŵatandite kumkamucisya Abulahamu mwati mpaka ŵakwete ngondolo syejinji ni yilango yine yejinji, soni ŵakwete ŵamasengo macilamacila. Nambo jwalakwe ni Sala nganakola ŵanace ŵakuŵeleka jemanjajo.

Abulahamu paŵakwete yaka 99, Yehofa ŵaŵecete kuti: ‘Ngumpa cilangano cakuti cimciŵa mtati jwa mitundu jejinji ja ŵandu.’ Nambo ana yikakombolece catuli, pakuŵa Abulahamu ni Sala ŵaliji ali acekulwipe mnope mwati ngaŵa mkombolekasoni kola mwanace?