UPʼÉEL tiʼ le kaajoʼob tuʼux bin le máakoʼob kajtal ka tsʼoʼok le Búulkabaloʼ u kʼaabaʼeʼ Ur. Ureʼ suunaj upʼéel noj kaaj chuup yéetel najoʼob jatsʼutstak. Baʼaleʼ, u kajnáaliloʼobeʼ ku meyajtkoʼob maʼ jaajil diosoʼobiʼ. Bey xan u beetkoʼob kaʼach Babeloʼ. U kajnáaliloʼob Ur yéetel Babeleʼ maʼ beyoʼob jeʼex Noé yéetel Sem maʼ tu pʼataj u meyajtkoʼob Jéeobaeʼ.

Noé, le máak jach tu beetaj baʼax u kʼáat Dioseʼ, trescientos cincuenta jaʼaboʼob tsʼoʼokok le búulkabal ka kíimoʼ. Kaʼapʼéel jaʼab kíimkeʼ ka síij le máak ka wilik teʼ dibujoaʼ. Tu táan Dioseʼ minaʼan kaʼach uláakʼ máak jeʼex le máakaʼ. U kʼaabaʼeʼ Abraham. Tiʼ kajaʼan kaʼach tu kaajil Ur yéetel u láakʼtsilileʼ.

Upʼéel u kʼiinileʼ Jéeobaeʼ tiaʼalaj tiʼ Abraham: Pʼat a luʼumil, bey xan a láakʼtsililoʼob, utiaʼal ka xiʼikech teʼ luʼum ken in weʼestechoʼ. ¿Tu beetaj wa baʼax aʼalaʼabtiʼ tumen Dios, kex ka yanak u pʼatik tuláakal le baʼaloʼob maʼalobtak yaan Uroʼ? Tu beetaj. Le oʼolal Abrahameʼ kʼuch kʼaj óoltbil u amigo Dios, tumen mantatsʼ kaʼach ku beetik baʼax u kʼáat Dios.

U jaats tiʼ u láakʼtsilil Abrahameʼ jóokʼ tu yéetel ka lukʼ tu kaajil Ur. Láakʼintaʼab tumen Taré, u taata. Bey xan tumen Lot, u sobrino. Jaaj bakáan, tak xan Sara jóokʼ tu yéetel. Ka máan kʼiineʼ kʼuchoʼob tu kaajil Arán, tiʼ kíim Tareiʼ. Náach yaniloʼob kaʼach tiʼ u kaajil Ur.

Ku tsʼoʼoleʼ, Abraham yéetel u láakʼtsilileʼ jóokʼoʼob Arán ka kʼuchoʼob tu luʼumil Canaán. Teʼeloʼ Jéeobaeʼ tiaʼalaj: Lelaʼ letiʼe luʼum ken in tsʼáa tiʼ a paalaloʼ. Abrahameʼ pʼáat tu kaajil Canaán, ka joʼopʼ u kajtal tiʼ pasel nookʼoʼob.

Dios túuneʼ káaj u yáantik Abraham, le oʼolal letiʼeʼ yanchaj yaʼabach tamanoʼob tiʼ, bey xan uláakʼ baʼalcheʼob yéetel yaʼab u j-meeyjiloʼob. Baʼaleʼ, Abraham yéetel Saraeʼ minaʼan kaʼach u paalaloʼob.

Tsʼoʼok 99 jaʼaboʼob tiʼ Abraham ka aʼalaʼabtiʼ tumen Jéeoba: Kin waʼaliktech yaan a kʼuchul a beetaba taatatsilil tiʼ yaʼabach kaajoʼob. Baʼaleʼ, lelaʼ ¿bix jeʼel u béeytal wa letiʼ yéetel Sara tsʼoʼok u chʼíijiloʼob utiaʼal ka yanak u paalaloʼobeʼ?