BUSHE naumona ico Abrahamu alecita? Ekete umwele kabili cilemoneka kwati alefwaya ukwipaya umwana wakwe. Cinshi alefwaila ukucita ico? Natubale tumone ifyo cali pa kuti Abrahamu na Sara bakwate uyu mwana.

Lesa alibalaile ukuti bali no kukwata umwana umwaume. Lelo apo Abrahamu na Sara bali abakalamba sana, camoneke kwati te kuti cicitike. Lelo Abrahamu alishibe ukuti takwaba ifyo Lesa engafilwa ukucita. Cinshi cacitike?

Palipitile umwaka umo ukufuma apo Lesa alaile Abrahamu na Sara ukuti bakakwata umwana. Lyena, ilyo Abrahamu ali ne myaka 100 ninshi Sara ali ne myaka 90, balikwete umwana umwaume uo bainike ati Isaki. Lesa alicitile ifyo alaile!

Lelo ilyo Isaki akulile, Yehova aeseshe Abrahamu pa kuti amone nga ali ne citetekelo. Yehova alimwitile ati, ‘Abrahamu!’ na o alyaswike ati ‘Mukwai!’ Lyena Lesa atile: ‘Buula umwana obe umwaume, umwana obe umo fye mpo, Isaki, uye na ku lupili ulo nalakulanga. Kulya umutuule ngo mutuulo wa koca.’

Abrahamu alyumfwile ubulanda pa fyo Lesa amwebele pantu alitemenwe sana umwana wakwe. Ibukisha ukutila Lesa alaile ukuti abana ba kwa Abrahamu bakekala mu calo ca Kanaani. Nomba cali no kuba shani nga Abrahamu alipeye Isaki? Abrahamu taishibe ico Lesa amwebeele ukuti epaye umwana wakwe, lelo alyumfwilile Lesa.

Ilyo bafikile pa lupili, Abrahamu akakile Isaki no kumubika pa ciipailo apangile. Abulile no mwele ukuti epaye umwana wakwe. Ilyo line fye malaika wa kwa Lesa abilikishe Abrahamu ati: ‘Abrahamu, Abrahamu!’ na o ayaswike ati: ‘Mukwai!’

Lesa atila: ‘Wi-ipaya umwana obe kabili wicita nangu cimo kuli ena, nomba naishiba ukuti walintetekela pantu taukene ukumpeela umwana obe, umo fye mpo.’

Abrahamu alitetekele sana Lesa! Alishibe ukuti takwaba ifyo Yehova engafilwa ukucita, kabili alishibe no kuti Yehova kuti abuusha Isaki ukufuma ku bafwa. Lelo, Lesa talefwaya ukuti Abrahamu epaye Isaki. E ico Lesa alengele impaanga ukwikatwa insengo mu fimpusa kabili amwebele ukutuula yena mu nshita ya kutuula umwana wakwe.