Maana 14nan

Ala ye Ibrahima ka dannaya kɔrɔbɔ

YALA i ɲɛ b’a la Ibrahima bɛ ka min kɛ yan wa? Muru de b’a bolo. A bɛ i ko a bɛna a denkɛ faga. Mun na a b’a fɛ k’a faga? An ka fɔlɔ k’a lajɛ Ibrahima ni Saran ye u denkɛ sɔrɔ cogo min na.

I kana ɲinɛ ko Ala tun ye layidu ta u ye ko u bɛna denkɛ sɔrɔ. Nka, o tun bɔlen bɛ ko fɛ min tɛ se ka kɛ, bawo Ibrahima ni Saran kɔrɔla kosɛbɛ. O bɛɛ n’a ta, Ibrahima tun dalen b’a la ko Ala tɛ dɛsɛ ko la. Nka, mun kɛra o kɔfɛ?

Ala ka layidu talen kɔfɛ, san kelen tɛmɛna. Ibrahima ye san 100 sɔrɔ tuma min na, ani Saran si tun bɛ san 90, u ye denkɛ sɔrɔ min tɔgɔ dara ko Isaka. Ala ye ko min layidu ta, a ye o kɛ.

Nka, Isaka kɔrɔbayara tuma min na, Jehova yɛ Ibrahima ka dannaya kɔrɔbɔ . Ala ko: ‘Ibrahima!’ Ibrahima y’a jaabi ko: ‘Ne filɛ!’ Ala ko: ‘I denkɛ, i denkɛ kelenpe Isaka ta i ka taa kulu kan ne bɛna min jira i la. O yɔrɔ la, i ka i denkɛ faga, ka a kɛ saraka ye.’

Ibrahima ye o kumaw mɛn minkɛ, a ɲɛsisira kosɛbɛ, bawo a bɛ a denkɛ fɛ kosɛbɛ. I kana ɲinɛ fana ko Ala tun ye layidu ta ko Ibrahima denw bɛna sigi Kanan jamana na. Nka, o tun bɛna se ka kɛ cogo di ni Isaka sara? Ibrahima ma foyi faamu, nka a sɔnna Ala ka kuma ma.

Ibrahima sera kulu kunna tuma min na, a ye sarakabɔlan dilan, ka Isaka siri, ka a da sarakabɔlan kan. A tilala ka muru ta ko a b’a denkɛ faga. Nka, o waati yɛrɛ la, Ala ka mɛlɛkɛ ye Ibrahima wele ko: ‘Ibrahima, Ibrahima!’ Ibrahima y’a jaabi ko: ‘Ne filɛ!’

Ala ko: ‘I kana se den ma. I kana fosi kɛ a la. Ne b’a dɔn sisan ko i dalen bɛ ne la, bawo i ma ne jɛ i denkɛ la, i denkɛ kelenpe la.’

Ibrahima ka dannaya tun ka bon kosɛbɛ dɛ! A tun dalen b’a la ko Jehova tɛ dɛsɛ fosi la. A tun dalen b’a la ko Ala tun bɛ se ka Isaka  su lakunun. Nka, Ala sago tun tɛ tiɲɛ na Ibrahima ka Isaka faga. O kosɔn, Ala y’a kɛ saga dɔ gere ka balan jiritu dɔ la u kɛrɛfɛ. Ala y’a fɔ Ibrahima ye ko a ka o saga ta k’o kɛ saraka ye, a denkɛ nɔ na.

Jenɛse 21:1-7; 22:1-18.