INAI laulau dekenai Aberahamo be dahaka ia karaia noho? Kaia ia dogoatao bona ena natuna mero ia alaia gwauraia. Dahaka dainai unai bamona ia karaia? To guna, Aberahamo bona Sara ese edia natuna idia abia dalana mani ita itaia.

Laloaboio lasi, Dirava ia gwauhamata natuna ta do ia henidia. To reana unai be hegeregere lasi, badina Aberahamo bona Sara idia buruka momokani. To Aberahamo ia laloa ia vara diba lasi gauna be Dirava ese ia karaia diba. Unai dainai dahaka ia vara?

Dirava ia gwauhamata murinai lagani ta ia ore. Bena Aberahamo ena mauri lagani be 100 bona Sara ena be 90 neganai, mero ta ladana Isako ia vara. Dirava ese iena gwauhamata ia hamomokania!

To Isako ia bada neganai, Iehova ese Aberahamo ena abidadama ia tohoa. Ia boiboi: ‘Aberahamo e!’ Bona Aberahamo ia haere: ‘Lau inai!’ Bena Dirava ia gwau: ‘Oiemu natuna tamona, Isako, oi abia bona oi dekenai do lau hahedinaraia ororo ta dekenai umui lao. Unuseniai emui natuna oi alaia bona lau dekenai oi henia boubou gauna bamona.’

Aberahamo be unai hereva ia kamonai neganai, ia lalohisihisi bada, badina ena natuna ia lalokau henia bada. Bona laloaboio lasi, Dirava ia gwauhamata Aberahamo ena natudia be Kanana tano dekenai do idia noho. To unai be edena bamona do ia guguru bema Isako ia mase? Aberahamo be unai ia lalo-pararalaia lasi, to Dirava ia kamonai henia.

Ororo dekenai ia ginidae neganai, Aberahamo ese Isako ia kwatua bona ia karaia boubou patana latanai ia atoa. Bena kaia ia abia iena natuna ia alaia totona. To unai nega korikori ai Dirava ena aneru ia boiboi: ‘Aberahamo e, Aberahamo e!’ Bona Aberahamo ia haere: ‘Lau inai!’

Dirava ia gwau: ‘Mero oi hadikaia lasi eiava ia dekenai kara ta oi karaia lasi. Hari lau diba oi ese lau oi abidadama henia, badina emui natuna tamona oi dogoatao lasi, to lau dekenai oi henia.’

Aberahamo ena abidadama Dirava dekenai be bada! Ia abia dae momokani Iehova be gau ibounai ia karaia diba bona Isako be mase amo ia hatorea isi lou diba danu. To Dirava ia ura lasi Aberahamo ese Isako ia alaia. Unai dainai mamoe ta ena doana be au ta ese ia dogoatao, bona Dirava ese Aberahamo ia hamaoroa unai mamoe ia bouboulaia, to iena natuna lasi.