Mukuru ma roro ongamburiro yaAbraham
EHUNGI 14
Mukuru ma roro ongamburiro yaAbraham
OVE mo munu kutja Abraham ma ungura tjike imba? Eye u na oruvyo, nu mape munika tjimuna ma zepa omuzandu we. Omena ratjike eye tji ma peya a tjiti nao? Rutenga, indjeye tu tare kutja Abraham na Sara omuzandu wawo ve mu muna vi.
Zemburuka, kutja Mukuru we ve kwizikira kutja mave panduka omuatje omuzandu. Nungwari ihi aatji munika tjimuna kamaa pe ya, mena rokutja Abraham na Sara va kurupire tjinene. Nungwari Abraham wa ri nongamburiro kutja Mukuru u yenena okutjita otjiṋa tji matji munika aayo kamaatji tjitwa. Okuzambo pa tjitwa tjike?
Pa kapita ombura imwe, kombunda ya indu Mukuru tja tjita omakwizikiro we. Okuzambo, Abraham tja ri nozombura 100 na Sara tja ri nozombura 90, va panduka okanatje okazandu kena Isak. Mukuru wa ṱiza omakwizikiro we!
Nungwari Isak tje kura, Jehova wa rora ongamburiro yaAbraham. Eye wa isana: ‘Abraham!’ Nu Abraham we mu zira: ‘Owami ngwi!’ Okuzambo Mukuru wa tja: ‘Toora Isak, omuzandu woye omukwatwaerike nu twende kondundu ami ndji me ku raisire. Ingo ka zepe omuzandu woye nu u mu punguhe.’
Omambo ngo tjiri ya hihamisa Abraham mena rokutja eye wa suverere omuzandu we tjinene. Zemburuka wina kutja Mukuru wa kwizika kutja ovanatje vaAbraham mave tura mu Kanaan. Nungwari ihi atja tji yenenisiwa vi indu Isak tja koka? Abraham kena pe tji zuva, nungwari eye wa puratena ku Mukuru.
Abraham tja vaza kondundu, wa kuta Isak ne mu twa kombanda yotjipunguhiro eye tja tungire. Okuzambo eye wa toora oruvyo okuzepa naro omuzandu we. Nungwari tjimanga moruveze ndo omuengeli waMukuru wa isana: ‘Abraham, Abraham!’ Nu Abraham we mu zira: ‘Owami ngwi!’
Mukuru wa tja: ‘Ohihamisa omuzandu, nu o tjiti otjipo ku ye! Ami nambano me tjiwa kutja u na ongamburiro mu Ami, mena rokutja ko Ndji ruruparere omuzandu woye omukwatwaerike.’
Abraham tjiri wa ri nongamburiro tjinene mu Mukuru! Eye wa ri nongamburiro kutja ka pa ri otjiṋa otjizeu ku Jehova, nokutja Jehova wina ma yenene okupendura Isak movakoke. Nungwari tjiri kaya ri ombango yaMukuru kutja Abraham ma zepe Isak. Mena ranao Mukuru wa tjita kutja onḓu i kakatere movihwa vyopopezu, na raere Abraham okupunguha yo moruveze romuzandu we.
Mo yenene okutara ku imbi wina
HOREREYE KONGAMBURIRO YAWO
Abraham—“Ihe yaavehe mbe kambura mu Ndjambi”
Abraham wa raisa vi ongamburiro? Ove mo vanga okuhorera kongamburiro yaAbraham momiano viṋe?
