Yeţţujeṛṛeb Abṛaham
TAQSIṬ TIS 14
Yeţţujeṛṛeb Abṛaham
TWALAḌ d acu i gxeddem dagi Abṛaham? Yeṭṭef lmus deg ufus-is am wakken yekker ad ineɣ mmi-s. Acuɣer ara t-ineɣ? Uqbel a d-nerr lǧawab, a nwali amek Abṛaham d Ṣara i d-sɛan mmi-tsen.
Tecfiḍ? Ṛebbi iwɛed-asen belli a d-sɛun aqcic. Lameɛna iban-ed am wakken d lmuḥal wannect-a, axaṭer Abṛaham d Ṣara llan d imɣaren. Meɛna Abṛaham, neţţa, yumen belli Ṛebbi yezmer i wayen yeḥseb wemdan d lmuḥal. D acu i geḍran ihi?
Tura iɛedda useggas kamel seg wasmi i gexdem Ṛebbi lemɛahda. Asmi i gewweḍ Abṛaham 100 iseggasen di leɛmeṛ-is, Ṣara 90, sɛan-d aqcic iwumi i semman Isḥaq. Ṛebbi yeṭṭef deg wawal-is!
Asmi i guɣal Isḥaq d argaz, Yahwa ijeṛṛeb liman n Abṛaham. Issawel-as: ‘Abṛaham!’ Abṛaham yerra-yas: ‘Anɛam!’ Ṛebbi yenna-yas: ‘Ddem mmi-k awḥid, Isḥaq, tṛuḥeḍ ɣer yiwen wedrar ara k-d-mleɣ. Dinna neɣ mmi-k tefkeḍ-t d asfel.’
Acḥal i sseḥznen lehduṛ-agi Abṛaham axaṭer iḥemmel aṭas mmi-s. Yerna tecfiḍ, Ṛebbi yewɛed belli tarwa n Abṛaham aţ-ţɛic di tmurt n Kanɛan. Lameɛna, amek ara yeḍru waya ma yemmut Isḥaq? Ɣas ur ifhim ara imeslayen-a, Abṛaham yuɣ awal i Ṛebbi.
Mi gewweḍ ɣer wedrar, Abṛaham icudd mmi-s Isḥaq, issers-it ɣef udekkan n iseflawen (uɛalṭar) i gebna. Syenna, Abṛaham iẓẓel afus-is ɣer lmus akken ad ineɣ mmi-s. Imiren kan lmelk n Ṛebbi issawel-as: ‘Abṛaham, Abṛaham!’ Abṛaham yerra-yas: ‘Anɛam!’
Ṛebbi yenna-yas s yimi n lmelk-nni: ‘Ur teẓẓel ara afus-ik ɣer weqcic-nni, ur s-xeddem acemma! Tura ẓriɣ belli tumneḍ yis-i axaṭer ur iyi-tekkiseḍ ara mmi-k, awḥid-ik.’
Acḥal i meqqer liman i gesɛa Abṛaham di Ṛebbi! Yumen belli yezmer Yahwa i kullec, yezmer ula i ḥeggu n Isḥaq si lmut. Lameɛna di tin n ṣṣeḥ, Ṛebbi ur yebɣi ara ad ineɣ Abṛaham mmi-s. Ɣef waya i s-d-issken yiwen ikerri iḥeṣlen deg inijel, yenna-yas i Abṛaham a t-yefk d asfel deg wemkan n mmi-s.
Laṣel n ddunit 21:1-7; 22:1-18.