MA NAKAANAW kʼaru yook xbʼaanunkil laj Abrahan? Chanchan naq ok re xkamsinkil li ralal! Ma nakaanaw kʼaʼut? Aatinaqo xbʼeenwa chirix li ralal laj Abrahan ut li xSara.

Ma jultik aawe naq li Yos kixye naq tixkʼe jun ralal laj Abrahan? Abʼan chanru teʼwanq xkʼuulaʼal laj Abrahan ut xSara xbʼaan naq cheekebʼ chik. Laj Abrahan naxnaw naq maakʼaʼ chʼaʼaj chiru li Yos. Qilaq chanru kikʼulmank aʼin.

Ak jun chihabʼ xnumik naq li Yos kixye re laj Abrahan naq twanq jun ralal. Naq kiyoʼlaak li kʼuulaʼal aʼin; laj Abrahan wank 100 chihabʼ re ut li xSara 90 chihabʼ. Aj Isaac keʼxkʼe choʼq xkʼabʼaʼ li kʼuulaʼal. Chi joʼkan kitzʼaqlok ru li kixye li Jehobʼa.

Ak nim chik laj Isaac, naq li Jehobʼa kixyal rix li xpaabʼal laj Abrahan. Li Jehobʼa kixye: ‹Abrahan!› Ut laj Abrahan kichaqʼok: ‹Arin wankin!› Tojaʼ naq li Yos kixye re: ‹Kʼam laawalal, li jun chaawu, saʼ li tzuul li tinye aawe. Aran taakamsi ut taamayeja chiwu›.

Kʼajoʼ naq kirahoʼk saʼ xchʼool laj Abrahan, xbʼaan naq jwal naxra li ralal! Ma jultik aawe naq li Yos kixye re laj Abrahan naq saʼ li tenamit Canaan teʼwanq li ralal xkʼajol? Chan raj ru kikʼulmank aʼin wi kikamk raj laj Isaac? Usta laj Abrahan inkʼaʼ kixtaw ru kʼaru yook chi kʼulmank, kiʼabʼink chiru li Yos.

Naq laj Abrahan kiwulak saʼ li tzuul, kixbʼakʼ laj Isaac ut kixtolobʼ bʼarwiʼ tixmayeja. Tojaʼ naq kirisi li xchʼiichʼ re xkamsinkil li ralal. Saʼ li hoonal aʼan, li xʼanjel li Yos kixye re: ‹Abrahan! Abrahan!› Kichaqʼok laj Abrahan: ‹Arin wankin!›

Tojaʼ naq li Yos kixye re: ‹Maachʼeʼ laawalal. Anaqwan ninnaw naq kaw laapaabʼal, xbʼaan naq inkʼaʼ xaaram laawalal chiwu›.

Laj Abrahan kaw xpaabʼal joʼkan naq chʼolchʼo chiru naq li Jehobʼa tixwaklesi wiʼ chik chi yoʼyo laj Isaac. Li Jehobʼa inkʼaʼ kiraj naq laj Abrahan tixkamsi laj Isaac. Joʼkan naq li Jehobʼa kixbʼaanu naq ttʼilq jun li karneer saʼ xyanq li cheʼ. Ut kixye re laj Abrahan naq tixmayeja li karneer aʼin choʼq reqaj laj Isaac.