WAHOTA kuona ũrĩa Iburahimu areka haha? Arĩ na kahiũ, na aronekana ta arenda kũũraga mũrũwe. Arenda gwĩka ũguo nĩkĩ? Mbere, tareke tũone ũrĩa Iburahimu na Sara maagĩire mwana wao.

Ririkana, Ngai aamerĩire nĩmaangĩagĩire mwana wa kahĩĩ. No ũndũ ũcio wonekire ta ũtangĩhotekeka, gĩtũmi nĩ tondũ Iburahimu na Sara maarĩ akũrũ mũno. O na gũtuĩka ũguo, Iburahimu nĩetĩkĩtie atĩ Ngai no ahote gwĩka ũndũ ũrĩa wonekaga ta ũtangĩhotekeka. Kwoguo-rĩ, gwatuĩkire atĩa?

Thutha wa Ngai kũheana kĩĩranĩro gĩake-rĩ, mwaka ũmwe ũkĩhĩtũka. Rĩu, rĩrĩa Iburahimu aarĩ na ũkũrũ wa mĩaka 100 na Sara 90, nĩ maagĩire kaana ga kahĩĩ getagwo Isaaka. Ngai nĩ aahingirie kĩĩranĩro gĩake.

No ĩndĩ rĩrĩa Isaaka akũrakũrire-rĩ, Jehova akĩgeria wĩtĩkio wa Iburahimu. Agĩĩtana: ‘Iburahimu-ĩ!’ Nake Iburahimu agĩcokia: ‘Niĩ ũyũ!’ Ngai agĩkĩmwĩra atĩrĩ: ‘Woe mũrũguo, o ũcio wa mũmwe, Isaaka, na ũthiĩ kĩrĩma-inĩ kĩmwe kĩrĩa ngũkuonia. Kũu ũũrage mũrũguo na ũmũrute atuĩke igongona.’

Tondũ Iburahimu nĩendete mũrũwe mũno-rĩ, ũhoro ũcio nĩ wamwĩkĩrire kĩeha mũno. Na ndũkariganĩrũo atĩ Ngai eranĩire atĩ ciana cia Iburahimu ingĩatũũrire bũrũri wa Kaanani. Isaaka aagĩkua-rĩ, ũndũ ũcio ũngĩahotekire atĩa? Iburahimu ndataũkĩirũo nĩ ũhoro ũcio, ĩndĩ nĩ aathĩkĩire Ngai.

Rĩrĩa aakinyire kĩrĩmainĩ-rĩ, Iburahimu nĩohire Isaaka na akĩmũigĩrĩra kĩgongona-inĩ kĩrĩa aakĩte. Akĩoya rũhiũ orage mũriũ. No o kahinda o kau mũraika wa Ngai agĩĩtana: ‘Iburahimu, Iburahimu!’ Nake Iburahimu agĩĩtĩka akiuga: ‘Niĩ ũyũ!’

Ngai akiuga,‘Menya ũhutie kĩhĩĩ gĩkĩ o na kana ũgĩĩke ũndũ o na ũrĩkũ.’ ‘Rĩu nĩ ndamenya atĩ nĩ ũnjĩhokete, kuona atĩ ndũnangiria mũrũguo, o mũrũguo ũcio wa mũmwe.’

Kaĩ Iburahimu aarĩ na wĩtĩkio mũnene he Ngai-ĩ! Etĩkĩtie atĩ gũtirĩ ũndũ o na ũrĩkũ ũngĩrema Jehova, na atĩ Jehova nĩangĩhotire kũriũkia Isaaka kuuma kũrĩ akuũ. Ĩndĩ ndwarĩ wendi wa Ngai Iburahimu orage Isaaka. Rĩu Ngai agĩtũma ndũrũme ĩnyitwo kĩhinga-inĩ kĩarĩ hakuhĩ, na akĩĩra Iburahimu amĩrute igongona ithenya rĩa mũriũ.