NANCHI wamona bibena kuba Abalahama pa kikye kipikichala nyi? Uji na kiswi, kyamweka ubena kukeba kwipaya mwananji wamulume. Mambo ka kyo abena kukebela kubila kino kintu? Patanshi twaya tumone Abalahama ne Sala byo basemene mwanabo.

Vuluka kuba’mba Lesa wibalaile amba bakekala na mwana wamulume. Bino kino kyamwekele’mba kuba kyakonsheka ne, mambo ba Abalahama ne Sala bajinga bakote. Nangwa byonkabyo, Abalahama waitabile kuba’mba Lesa wakonsheshe kuba kintu kyamweka nobe kechi kyakonsha kubiwa ne. Pano ki ka kyaubiwe?

Papichile mwaka umo kufuma Lesa po amulaijile. Abalahama byo afikizhe myaka ya kusemwa 100 ne Sala naye 90, po po baikajile na mwana wamulume ne kumutumba jizhina amba Izaka. Lesa wafikizhe mulaye wanji!

Bino Izaka byo akomene Yehoba waesekele lwitabilo lwa kwa Abalahama. Waichile’mba: ‘Abalahama!’ Ne Abalahama wakumbwile’mba: ‘Amiwa bano!’ Kepo Lesa amwambijile’mba: ‘Pano utwale mwanobe, yenkawa umo ye uji nanji, aye Izaka, uye ku mutumba umo yenkawa ye nkakubula. Konkakwa ukamwipaye ke mulambo.’

Bino byambo byaletele bingi bulanda kwi Abalahama mambo watemenwe bingi mwananji. Kabiji vuluka kuba’mba, Lesa walayile kuba’mba baana ba kwa Abalahama bakekala mu kyalo kya Kenana. Pano bino uno mulaye wafwainwe kufikizhiwa byepi umvwe Izaka wafwile? Abalahama wakankelwe kuyuka kine kintu, bino wamukokejile Lesa.

Byo afikile ku mutumba, Abalahama wakashile Izaka ne kumutula pa kya kusokelapo bitapisho kyo atungile. Kepo ashikwile kiswi amba amwipaye mwananji. Bino pa kyonkakya kimye malaika wa Lesa wamwichile’mba: ‘Abalahama, Abalahama!’ Kabiji Abalahama wakumbwile’mba: ‘Amiwa bano!’

Lesa wamwambijile’mba: ‘Kechi ubike kuboko pa mwana ne, nangwa kumuba kintu kimo ne. Pano nayuka namba obewa ungakamwa mambo kechi wakana kumpa mwanobe, yenkawa umotu ye uji nanji ne.’

Abalahama wamwakaminwenga bingi Lesa! Waitabile kuba’mba kafwako kintu nangwa kimo Yehoba kyo afwainwa kukankalwa ne, ne kuba’mba Yehoba wakonsheshetu ne kumusangula Izaka kufuma ku bafu. Bino Lesa kechi wakebele’mba Abalahama epaye Izaka ne. Onkao mambo Lesa walengejile mukooko kupachila mu kipupu kyajinga pepi, kabiji waambijile Abalahama kumulambula mu kifulo kya mwananji.