TO MONO asi yinke ana kurugana Abirahamu apa? Age kuna kwaterere mbere, ntani kuna kumoneka ngwendi asi ta dipaga munwendi. Yisinke nayi ruganena oyo? Pomuhowo, tu tareni asi ngapi omu oAbirahamu naSara va gwene munwawo.

Diworoka asi Karunga kwa va tumbwidilire asi ngava kara nomuna. Nye eyi kwa monekere ngwendi nokuvhura si, morwa Abirahamu naSara kwa kurupire unene. Nampili ngoso, Abirahamu ga pulire asi Karunga kuvhura kurugana eyi ya monekere ngwendi nokuvhulika si. Yisinke nye ya horokere?

Konyima zapa Karunga ga geve etumbwidiro lyendi, mvhura nazinye tazi lipitire. Makura apa ga kere Abirahamu age nomvhura 100 ano Sara nomvhura 90, yipo va retere mukeke gomumati gedina Isaka. Karunga ga sikisire mo etumbwidiro lyendi!

Nye apa Isaka ga kulire, Jehova kwa hetekere epuro lyaAbirahamu. Age kwa zigidire asi: ‘Abirahamu!’ Ano Abirahamu ta limburura asi: ‘Nyame ogu!’ Karunga makura ta tanta asi: ‘Gusa munoge Isaka, empogwe lyoge, makura o ze kondundu ezi ngani ku likida. Oko makura o ka dipage munoge nokukamugava ngonzambo.’

Ee, ngapi tupu omu ya guvisire eyi Abirahamu, morwa Abirahamu kwa here munwendi unene. Diworoka hena, Karunga kwa tumbwidilire asi vana vaAbirahamu ngava ka tunga mosirongo saKanani. Nye ngapi omu ngayi horoka eyi nsene Isaka ana fu? Abirahamu kapi ga yi zuvhire nawa, nye nampili ngoso age kwa limburukwire kwaKarunga.

Apa ga ka sikire kondundu, Abirahamu ta manga Isaka nokumutura posizambero esi ga tungire. Makura ta gusa mbere a dipage munwendi. Posiruwo sooso muengeli gwaKarunga ta zigida asi: ‘Abirahamu, Abirahamu!’ Abirahamu ta limburura asi: ‘Nyame ogu!’

Karunga ta tanta asi: ‘Wa ha gonwena munoge kuwoko koge ndi o mu rugane yuma. Ngesi nina diva asi ove kwa pura mwange, morwa kapi ono nyokere nge munoge, empogwe lyoge.’

Ee, epuro musi ga kere nalyo Abirahamu mwaKarunga! Age kwa pulire asi kwato eyi ayi tjindire Jehova, ntani asi Jehova kuvhura nampili kupindura Isaka konomfa. Nye ayo kapisi yiyo ga here nawa-nawa Karunga asi Abirahamu ngano a dipage Isaka. Karunga yipo ga ninkisire nzwi zi lidingire moyihwa yopopepi, makura ta tantere Abirahamu a zi zambe mevango lyokuzamba munwendi.

Genesis 21:1-7; 22:1-18.