Icisimicisyo 14: BaLesa Baesya Icicetekelo Cakwe Ablaamu
KANI ungabona ifi Ablaamu alukucita apa? Ali ne cibesi, kabili cilukuboneka koti alukwipaya umwana wakwe. Mba nindo engacitile’fyo? Icakutanga, leka tubone ifi Ablaamu na Sala bakwete umwana umwalalume.
Anuka ukweba’ti, baLesa balibalaile ati bakakwato’mwana. Pano ico calibonekele icikatesye, pakuti Ablaamu na Sala baali bacekulu. Nangabe’fyo, Ablaamu alicetekele baLesa ukweba’ti bangacita icilukuboneka icikatesye. Pano cindo cacitikile?
Umwaka walipitile ukufuma apo baLesa balaile. Pano ili Ablaamu aali ne myaka 100 na Sala aali ne myaka 90, balikwete akacece akalalume akailicilwe ati Isaci. BaLesa balilamine ukulaya kwabo.
Pano ili Isaci akulile, baYehoba balyesesye icicetekelo cakwe Ablaamu. Balilabile ati: ‘Ablaamu!’ Naye Ablaamu alyasukile ati: ‘Ninebo nkuno!’ Eli baLesa balabile ati: ‘Pinto’mwana wobe, uyo uli enka, Isaci, kabili uye ku lupili ulu nkakulanga. Uko ukamwipaye umwana wobe ne kumupa koti mulambu.’
Mama amasiwi aya ifi abombomanikile Ablaamu, pakuti alimutemenwe ukwakuti umwana wakwe! Kabili anuka ukweba’ti baLesa balilaile ati abana bakwe Ablaamu bakekala mu calo ca Kanani. Pano ici nga cali ne kucitika syani kani Isaci alifwile? Ablaamu taumfwisisyepo umucalolele, nangabe’fyo alikutikile kuli baLesa.
Ili bafikile ku lupili, Ablaamu alikakile Isaci ne kumubika pa conto ici aibakile. Eli abulile icibesi ukweba’ti epaye umwana wakwe. Pano pa kapindi kenkako inkalamba ya baLesa yalilabile ati: ‘Ablaamu, Ablaamu!’ Naye Ablaamu alyasukile ati: ‘Ninebo nkuno!’
BaLesa balilabile ati: ‘Wimusomesya umusankwa neli kumucita neli kantu. Pano naisiba ukweba’ti uli ne cicetekelo muli nebo, pakuti tonkenye umwana wobe, uyo uli enka.’
Mama icicetekelo ubukulu Ablaamu akwete muli baLesa! Alicetekele ukweba’ti takupo icikatesye kuli baYehoba, kabili ati baYehoba koti bamubusya Isaci na pa bafwile. Pano icinenene tacalipo kufwaya kwa baLesa ukweba’ti Ablaamu epaye Isaci. Namulifyefyo baLesa balilengele imbelele ukwikatwa mu cinsokela icali apepi, kabili balyebele Ablaamu ukuipelo’mulambu pa mupunda wa mwana wakwe.
Ifyakutaŋga 21:1-7; 22:1-18.
Ifyakwipusya
- Mba nikwisa kulaya baLesa balaile Ablaamu, kabili baLesa balikulamine syani ukulaya kwabo?
- Koti nifyefyo ifilangililwe mu cikope, mba baLesa balyesesye syani icicetekelo cakwe Ablaamu?
- Mba findo Ablaamu acitile, nangaba’ti taumfwisisyepo umulandu baLesa bamufundiile’fyo?
- Mba findo fyacitikile ili Ablaamu abulile icibesi ati epaye umwana wakwe?
- Icicetekelo cakwe Ablaamu calikosele syani?
- Mba nicindo baLesa bamuteyanisisye Ablaamu ati apeele umulambu, kabili balimuteyanisisye syani?
Ifyakwipusya na fimbi
- Pendeni Ifyakutaŋga 21:1-7.
Mba nindo Ablaamu akopwelele umwana wakwe umwalalume pa kasuba ka busisanu na sitatu? (Taŋ. 17:10-12; 21:4)
- Pendeni Ifyakutaŋga 22:1-18.
Isaci alilangile syani ukulicefya kuli ba Ablaamu bawisi, kabili ici calilangilile syani icintu ca kuntangile icicindeme makosa? (Taŋ. 22:7-9; 1 Kol. 5:7; Filip. 2:8, 9)
