LELO umwene bilonga Abalahama pano? Ukwete lupete, ne bimweka bu usakanga kwipaya wandi mwana. Mwanda waka usaka kumwipaya? Dibajinji bidi, tubandaulei muswelo wābutwile Abalahama ne Sala uno wabo mwana.

Vuluka, Leza wēbalaile’mba bakabutula mwana. Inoko kyāmwekele bu kekikokejikapo, ke-bantu ba Abalahama ne Sala bādi ke banunu bininge. Inoko, Abalahama wāitabije amba Leza ukokeja kulonga kyokya kimweka bu kekikokejikapo. Lelo i kika kyālongekele?

Mwaka mutuntulu wāpityile’po tamba pālaile Leza uno mulao. Kupwa, kitatyi kyābwenye Abalahama myaka 100, Sala nandi myaka 90, bābutula mwana mwana-mulume, bāmwinika dya bu Isake. Leza wāfikidije mulao wandi!

Ino pātamine Isake, Yehova wātompele lwitabijo lwa Abalahama. Wāmwita’mba: ‘Abalahama!’ Abalahama nandi wālondolola’mba: ‘Vidye Kalombo.’ Kupwa Leza wānena’mba: ‘Sela obe mwana, mwana obe umo kete, Isake, enda ku lūlu lonkakulombola. Shi ubafika’ko, ipaya obe mwana ne kumwela konka ke kya mulambu kisōkwe.’

Bine Abalahama wākwetwe bulanda bukatampe pa kwivwana bino binenwa, ke-muntu wādi usenswe wandi mwana bininge. Kadi vuluka, Leza wālaile’mba bana ba Abalahama bādi ba kukekala mu ntanda ya Kenani. Inoko byādi bya kwikala namani shi Isake wāfwile? Abalahama kāivwanijepo kino, inoko wakōkela Leza.

Kitatyi kyaāfikile ku lūlu, Abalahama wākuta Isake myonji ne kumutūla pa madabahu awāshimikile. Kupwa wākwata kipete amba epaye wandi mwana. Ponka’po, mwikeulu wa Leza wāmwela lubila’mba: ‘Abalahama, Abalahama!’ Abalahama nandi wāitaba’mba: ‘Vidye Kalombo!’

Leza wānena’mba: ‘Kokatapa mwanuke nansha kumulonga kintu kampanda. Pano nayuka’mba wakaminwe Leza byokumpelejepo mwana obe, mwana obe umo kete.’

Bine Abalahama wādi na lwitabijo lukomo mudi Leza! Wādi ukulupile’mba i kutupu kintu kikomēne Yehova kulonga, ne amba ukokeja nansha kusangula Isake mu bafwe. Inoko Leza kādipo usaka Abalahama epaye Isake. Penepo Leza wātonona mukōko amba upatame mu kivunda kyādi pabwipi, kadi wāsapwila Abalahama eulambule bu kya mulambu kisokwe kya kupingakena pa wandi mwana.