TLAPOUALISTLI 14

Omoyejyeko itlaneltokilis Abrahán

¿TIKITA tlen kichijtok Abrahán? Kipia se cuchillo, uan moita kimiktis ikone. ¿Tleka? Achto, ma tikitakan ken okipixkej inkone Abrahán uan Sara.

Xikilnamiki, toTajtsin Dios okinmakak itlajtol kipiaskiaj se konetl. Maski ijkon, non onesiaya amo uelis mochiuaskia, pampa Abrahán uan Sara yokipiayaj miak xiuitl. Maski ijkon, Abrahán okineltokaya toTajtsin Dios uelis kichiuas tlen nesi amo uelis mochiuas. Ik non, ¿tlen opanok?

Satepan, ijkuak toTajtsin Dios okijto kinmakaskia se konetl, opanok se xiuitl. Uan ijkuak Abrahán okipiaya 100 xiuitl uan Sara 90 xiuitl, okipixkej se konetl tlen okitokayotijkej Isaac. ¡ToTajtsin Dios okichi ijkon ken okijto!

Ijkuak Isaac okipiaya okachi xiuitl, Jehová okiyejyeko itlaneltokilis Abrahán. Okijto: ‘¡Abrahán!’. Uan Abrahán otlanankili: ‘¡Nikan nika!’. Satepan, toTajtsin Dios okilui: ‘Xikuika mokone, san se tlen tikpia, Isaac, uan xio itech tepetl tlen nimitsititis. Ompa xikmikti mokone uan xinechmaka ken se tlamanal’.

¡Abrahán omoyolkoko miak pampa sapanoa okitlasojtlaya ikone! Uan xikilnamiki, toTajtsin Dios okitemakak itlajtol ikoneuan Abrahán chantiskiaj itech Canaán. Maski ijkon, ¿ken mochiuaskia nin tla Isaac mikiskia? Abrahán amo okimatiaya ken mochiuaskia, maski ijkon, okitlakamatki toTajtsin Dios.

Ijkuak oajsito itech tepetl, Abrahán okilpi Isaac uan okitlali ipan altar tlen okichijchi. Ijkuakon, okikixti se cuchillo pampa ika kimiktiskia ikone. Maski ijkon, iángel toTajtsin Dios san niman okijto: ‘¡Abrahán, Abrahán!’. Uan Abrahán otlanankili: ‘¡Nikan nika!’.

ToTajtsin Dios okijto: ‘Amo itlaj xiktokti mokone. Axkan yinikmati tinechneltoka, pampa tiknekia tinechmakas mokone, san se mokone tlen tikpia’.

¡Se ueyi tlaneltokilistli okipiaya Abrahán itech toTajtsin Dios! Ye okineltokaya amo itlaj onka tlen Jehová amo uelis kichiuas, uan noijki okineltokaya Jehová uelis kiyolitiskia Isaac. Uan melauak, toTajtsin Dios amo okinekiaya Abrahán ma kimikti Isaac; okichi se ichka ma motseko itech xiuitl, uan okilui Abrahán ma kimikti ichka uan amo Isaac.

Génesis 21:1-7; 22:1-18.