WEETE oityi Abraiau ekahi nokuliga apa? Una onkhiki peke, ngoti mahande okuipaa omona wae. Omokonda yatyi alingila ngotyo? Tete, nkhele tutalei oñgeni Abraiau na Sara veya okutyita omona wavo ou.

Hinangela okuti Huku wevelaele okuti mavatyiti omona. Mahi, otyo ankho tyimoneka ngoti tyepwiya. Mokonda Abraiau na Sara ankho vakulupa. Anthi, Abraiau wetavelele okuti Huku upondola okulinga tyina tyihevilwa. Okuti Huku wafuisapo omulao wae?

Papita enima, tunde etyi Huku alinga omulao wae. Konyima, etyi Abraiau ankho pahe ena omanima 100, iya Sara ena 90 omanima, vatyita omona omukuendye atiwa o Isake. Ngotyo, Huku wafuisapo omulao wae.

Anthi, etyi Isake ekula, Yehova waheteka ekolelo lia Abraiau. Huku wemuihana ati: ‘Ove Abraiau!’ Abraiau akumbulula okuti: ‘Ame uno!’ Iya Huku ati: ‘Tyinda omona wove, omona wove wike vala Isake, enda komphunda imue madyikulekesa. Kemuipaele komphunda oyo, omulingi otyilikutila pala ame.’

Onondaka ombo mbanumanesa unene Abraiau, mokonda ankho uhole unene omona wae. Tupu, hinangela okuti ankho Huku walaa okuti maavela ovana va Abraiau otyilongo tyo Kanaa. Iya otyo matyiende ñgeni, inkha Isake unkhia? Abraiau akala tyihetyi vali. Mahi, nongotyo watavela ku Huku.

Etyi Abraiau ehika komphunda wakuta Isake, emupake kombanda yomutala wotyilikutila ankho atunga. Apolo onkhiki pala okuipaa omona wae. Mahi, oandyu ya Huku aimuihana liwa aiti: ‘Abraiau, Abraiau!’ Abraiau akumbulula okuti: Ame uno!’

Oandyu aiti: Huku wati, ‘Wahaipae omona. Pahe ndyityii okuti una ekolelo muame. Mokonda kuaanyene okumpha omona wove wike vala.’

Abraiau ankho una ekolelo enene mu Huku. Abraiau ankho utyii okuti natyike tyipona Yehova. Ankho utavela okuti Yehova upondola alo umue okupindulapo Isake kononkhia. Mahi, tyotyili Yehova ankho kahandele Abraiau aipae Isake. Moluotyo, Huku wahakesa oongi imue menkhondo ankho likahi popepi na Abraiau. Iya atolela Abraiau alinge otyilikutila tyae nongi oyo okupingiya po mona wae.