Ruhanga Okugyeza Okwikiriza kwa Abrahamu
Ekitebyo 14
Ruhanga Okugyeza Okwikiriza kwa Abrahamu
NOREEBA eki Abrahamu ariyo naakora hanu? Aine omusyo kandi naareebeka nk’orikuza kwita omutabani. Ahabw’enki yaabaire naayenda kukora ekyo? Ka tubanze twetegyereze oku Abrahamu na Saara baatungire omwana waabo w’omwojo.
Ijuka, Ruhanga akaba yaabaraganiise ngu bakaba nibaija kugira omwana w’omwojo. Kwonka ekyo kikareebeka nk’ekitarikubaasika, ahabw’okuba Abrahamu na Saara bakaba bakuzire munonga. Abrahamu baitu nabwe, akaba naikiriza ngu Ruhanga naabaasa kukora ekyabaire nikireebeka nk’ekitarikubaasika. Mbwenu shi n’enki ekyabaireho?
Bwanyima y’okuraganisa kwa Ruhanga, hakahinguraho omwaka gwona. Haza, bwanyima Abrahamu ku yaahikize emyaka 100 na Saara aine 90 y’obukuru, bakazaara omwana w’omwojo orikwetwa Isaaka. Ruhanga akarinda endagaano ye!
Kwonka Isaaka ku yaakuzire, Yehova yaagyeza okwikiriza kwa Abrahamu. Akeeta ati: ‘Abrahamu!’ Na Abrahamu yaagarukamu ati: ‘Ndi hanu!’ Atyo Ruhanga yaagira ati: ‘Twara mutabani waawe, omwe nyamunegyere, Isaaka, oze aha kibungo eki ndakworeke. Okwo oitireyo mutabani waawe kandi omutambe nk’ekitambo ekyokize.’
Ebigambo ebyo ka byareetaire Abrahamu enaku, ahakuba Abrahamu akaba naakunda omwana we munonga. Kandi ijuka, Ruhanga akaba yaaraganiise ngu abaana b’Abrahamu bakaba nibaija kutuura omu nsi ya Kanaani. Kwonka shi ekyo kikaba nikiija kubaho kita kuri Isaaka yaafiire? Abrahamu tarabyetegyereize, kwonka nabwe akoorobera Ruhanga.
Ku yaahikire aha kibungo, Abrahamu yaaboha Isaaka reeru yaamugarika aha itambiro eri yaayombekire. Nikwo yaihayo omusyo kwita omwana we. Omu kaanya ako maraika wa Ruhanga yaamweta naagira ati: ‘Abrahamu, Abrahamu!’ Na Abrahamu yaayetaba ati: ‘Ndi hanu!’
Ruhanga yaamugira ati: ‘Otasaasa ogwo mwojo nari kugira ekintu kyona eki waamwitsa, ahabw’okuba hati naamanya ku orikutiina Ruhanga ahabw’okuba tiwanyima mwana waawe omwe nyamunegyere.’
Abrahamu ka yaabaire aine okwikiriza kuhango omuri Ruhanga! Akaikiriza ngu tihaine ekyabaire nikirema Yehova, kandi ngu Yehova akaba naabaasa kuzoora Isaaka kuruga omu bafu. Manya buzimazima Ruhanga akaba atakunzire ngu Abrahamu aite Isaaka. N’ahabw’ekyo, Ruhanga akareetera entaama kukwata ebikamba omu rushaka orwabaire ruri haihi, kandi yaagambira Abrahamu okutamba egyo ntaama omu mwanya gw’omwana we.
