¿LA KAWILO su tijan kubʼan ri Abrahán? Kʼo jun chʼichʼ pa uqʼabʼ, kkaʼyik che kraj kukamsaj ri ukʼojol. ¿Suche kabʼij at? Nabʼe chqilaʼ su ubʼanik che ri Abrahán rukʼ ri Sara xkʼejeʼ jun kalkʼwal.

Masach pa ajolom, che ri Ajawaxel xutzujuj jun kalkʼwal. Rumal che ri Abrahán rukʼ ri Sara sibʼalaj e riʼj chik, kkaʼyik che kekun ta chik kkʼejeʼ kalkʼwal. Tekʼuriʼ ri Abrahán retaʼm che ri Ajawaxel kkunik kubʼano sulaʼ kkaʼyik che kʼot nijun kkunik kubʼano. Rumal laʼ, ¿su xbʼantajik?

Ri Ajawaxel xutzujuj wariʼ, tekʼuriʼ xqʼax jun junabʼ. Tekʼuriʼ chiʼ kʼo 100 ujunabʼ ri Abrahán, xuqujeʼ ri Sara kʼo 90 ujunabʼ, xkʼejeʼ jun kalkʼwal ubʼiʼ Isaac. ¡Ri Ajawaxel xubʼan sulaʼ xutzujuj!

Chiʼ ri Isaac nim chik, ri Jehová xrilo we qastzij kʼo ukojonik ri Abrahán. Xubʼij che: ‹¡Abrahán!› Tekʼuriʼ ri Abrahán xubʼij: ‹¡Waral in kʼo wi!› Tekʼuriʼ ri Ajawaxel xubʼij: ‹Chakʼamaʼ bʼi ri injun akʼojol ubʼiʼ Isaac, tekʼuriʼ jat pa ri juyubʼ o jibʼ che kinkʼut chawäch. Chilaʼ chakamsaj ri akʼojol tekʼuriʼ chayaʼ che tabʼal toqʼobʼ (sacrificio)›.

¡Xbʼison ri Abrahán rumal che sibʼalaj kraj rukʼojol! Masach pa ajolom, ri Ajawaxel utzujum kanoq che täq ralkʼwal ri Abrahán kekʼaseʼ pa Canaán. ¿La kbʼantaj na we tzij riʼ wat xkam ri Isaac? Ri Abrahán kuchʼabʼ ta wariʼ, tekʼuriʼ xunimaj ronojel su xubʼij ri Jehová che.

Chiʼ xopan pa ri juyubʼ o jibʼ, ri Abrahán xuxim ri Isaac tekʼuriʼ xuya puwiʼ jun altar. Tekʼuriʼ xresaj lo ri chʼichʼ rech kukamsaj ri ukʼojol. Tekʼuriʼ chanim jun ángel rech ri Ajawaxel xusikʼij: ‹¡Abrahán, Abrahán!›, xchaʼ che. Tekʼuriʼ ri Abrahán xubʼij: ‹¡Waral inkʼo wi!›

‹Xaq mabʼan kʼäx che ri ala›, xchaʼ ri Ajawaxel. ‹Kimik wetaʼm che katkojon chwe, rumal che xawaj xaya ri akʼojol chwe, tekʼuriʼ xiw jun akʼojol.›

¡Qas nim ri ukojonik ri Abrahán chirij ri Ajawaxel! Kuchʼobʼo che ri Jehová kkunik kubʼano sulaʼ kkaʼyik che nijun kkunik kubʼano, xuqujeʼ che kkunik kuwalajsaj ri Isaac che kixoʼl ri kamnäq. Ri Ajawaxel qastzij täj che xraj che ri Abrahán xukamsaj ri Isaac; xubʼano che jun chij xuxim ribʼ pa täq xikʼaʼy che unaqaj che ri Abrahán rech kukoj che tabʼal toqʼobʼ pa ukʼaxel ri Isaac.