MO BÂ ye so Abraham ayeke sara na lê ti foto so? Zembe ayeke na maboko ti lo, mo bâ mo tene lo ye ti fâ molenge ti lo. Me lo ye ti sara tongaso ngbanga nyen? Kozoni, zia e bâ tongana nyen Abraham na Sara awara molenge ti ala ti koli.

Girisa pëpe so Nzapa atene lani na ala so ala yeke dü molenge ti koli. Me ye so akpa ti si pëpe, tënë ti so ala ga mbakoro mingi awe. Ye oko, Abraham ahinga so Nzapa alingbi ti sara ye kue. Tongaso, nyen la asi?

Ngu oko ahon na peko ti tënë so Nzapa atene na Abraham. Tongana Abraham awara ngu 100 na Sara awara ngu 90, ala dü molenge ti koli na ala iri lo Isaac. Jéhovah atene tâ tënë!

Tongana Isaac akono awe, Jéhovah atara mabe ti Abraham. Lo iri lo, lo tene: ‘Abraham!’ Abraham akiri tënë, lo tene: ‘Mbi la!’ Nzapa atene: ‘Mû molenge ti mo Isaac, na gue na kota hoto so mbi yeke fa na mo. Kâ, fâ molenge ti mo na mû lo na sandaga.’

Vundu asara Abraham mingi ngbanga ti so lo ye molenge ti lo ngangu. Girisa pëpe, Nzapa atene so amolenge ti Abraham ayeke duti na sese ti Canaan. Me ye so ayeke si tongana nyen tongana Isaac akui? Abraham agbu nda ni mbilimbili pëpe, me lo mä yanga ti Nzapa kamême.

Tongana ala si na kota hoto so, Abraham akanga Isaac na lo zia lo na ndo ti balaga so lo leke. Na pekoni, lo mû zembe ti fâ na molenge ti lo. Me tâ gi na ngoi ni so, ange ti Nzapa airi lo, lo tene: ‘Abraham! Abraham!’ Abraham akiri tënë, lo tene: ‘Mbi la!’

Nzapa atene: ‘Sara sioni na molenge ni pëpe! Mbi hinga fadeso awe so mo mä na bê na mbi, teti so mo gbanzi oko ngengele molenge ti mo na mbi pëpe.’

So kota mabe si Abraham afa na mbage ti Nzapa! Lo mä na bê so Jéhovah alingbi ti sara ye kue, na Jéhovah alingbi même ti zingo Isaac na kuâ. Ti tâ tënë ni, Nzapa aye lani si Abraham afâ molenge ti lo pëpe. Tongaso, lo sara si ambeni kete keke agbu didi ti mbeni ngasangbaga, na lo tene na Abraham ti mû lo na sandaga na place ti molenge ti lo.