UYAMBONA yini Abrahama kutsi wentani kulesitfombe? Uphetse umukhwa, futsi kubonakala shengatsi ufuna kubulala indvodzana yakhe. Angayentelani intfo lenjena? Ase sicale sibone kutsi bo-Abrahama naSara bayitfola kanjani indvodzana yabo.

Khumbula, phela Nkulunkulu abetsembise kutsi bebatawuba nendvodzana. Kodvwa kwakubonakala kungeke kwenteke loko, ngoba Abrahama naSara besebagugile. Abrahama yena abekholwa kutsi Nkulunkulu angakwenta lokubonakala shengatsi angeke kwenteke. Kwentekani-ke?

Kwendlula umnyaka wonkhe Nkulunkulu ente lesetsembiso. Kwatsi Abrahama nakaneminyaka lengu-100 budzala, Sara yena analengu-90, batfola umntfwana wemfana bametsa batsi ngu-Isaka. Nkulunkulu wasigcina setsembiso sakhe.

Kwatsi Isaka sekakhulile, Jehova wavivinya lukholo lwa-Abrahama. Watsi kuye: ‘Abrahama!’ Yena wasabela watsi: ‘Ngilapha!’ Nkulunkulu watsi: ‘Tsatsa Isaka indvodzana yakho leyodvwana, uye nayo entsabeni lengitakulayela yona. Ufike uyibulale wente umhlatjelo ngayo.’

Lamavi amvisa buhlungu Abrahama, ngoba abeyitsandza kakhulu indvodzana yakhe. Khumbula, phela Nkulunkulu abemtsembise kutsi bantfwana bakhe bebatawuhlala eveni laseKhenani. Bekutakwenteka kanjani loko nangabe Isaka abesafile? Abrahama akazange akucondze loko, kodvwa wachubeka walalela Nkulunkulu.

Nakefika entsabeni, Abrahama wabopha Isaka wambeka etinkhunini etikwelilati labekalentile. Wabese ukhipha umukhwa kuze abulale indvodzana yakhe ngawo. Kepha ingilosi yaNkulunkulu yambita yatsi: ‘Abrahama! Ye Abrahama!’ Wasabela watsi: ‘Ngilapha!’

Nkulunkulu utse: ‘Ungacali ulimate lomfana futsi ungenti lutfo kuye. Nyalo sengiyati kutsi uyakholwa kimi, ngoba awukayigodli indvodzana yakho, lekukuphela kwayo.’

Abrahama abenelukholo lolukhulu kuNkulunkulu. Abekholwa kutsi ayikho intfo lebeyingamehlula Jehova, nekutsi abetayivusa indvodzana yakhe Isaka ekufeni. Kwakungesiyo intsandvo yaNkulunkulu kutsi Abrahama abulale Isaka. Kungako Nkulunkulu abangela kutsi imvu ibambeke ngetimphondvo esihlahleni, wabese utjela Abrahama kutsi abulale yona ayente ibe ngumhlatshelo esikhundleni sendvodzana yakhe.