BELE haree saida mak Abraão halo iha dezeñu neʼe ka lae? Nia iha tudik, no haree hanesan nia atu oho nia oan. Tansá mak nia halo hanesan neʼe? Uluk, mai ita haree oinsá mak Abraão no Sara iha oan.

Hanoin-hetan, Maromak promete ba sira katak sira sei iha oan-mane ida. Maibé, haree hanesan ida-neʼe la bele mosu, tanba Abraão no Sara katuas no ferik liu ona. Maski nuneʼe, Abraão fiar katak Maromak bele halo buat hotu. Entaun, saida mak akontese?

Depois Maromak halo promesa neʼe, tinan ida liu tiha ona. Kuandu Abraão tinan 100 no Sara tinan 90, sira hetan oan-mane naran Isaac. Maromak halo tuir duni ninia promesa!

Maibé, bainhira Isaac sai boot liu, Jeová koko Abraão nia fiar. Nia bolu: ‘Abraão!’ No Abraão hatán: ‘Haʼu mak neʼe!’ Depois Maromak hatete: ‘Lori ó-nia oan, ó-nia oan mesak, no bá foho ida neʼebé haʼu sei hatudu ba ó. Iha neʼebá, oho ó-nia oan no fó nuʼudar sakrifísiu ida.’

Liafuan neʼe halo Abraão triste duni, tan Abraão hadomi tebes nia oan. No hanoin-hetan, Maromak promete ona katak Abraão nia oan sira sei moris iha rai Kanaan. Maibé, oinsá ida-neʼe bele mosu se Isaac mate? Abraão la komprende, maski nuneʼe nia halo tuir.

Kuandu toʼo foho neʼe, Abraão harii altár ida, kesi Isaac no tau iha altár leten. Depois, nia foti tudik ida atu oho nia oan. Maibé, iha tempu neʼebá kedas, Maromak nia anju bolu: ‘Abraão, Abraão!’ No Abraão hatán: ‘Haʼu mak neʼe!’

Maromak hatete: ‘Keta hakanek labarik neʼe, ka halo buat ruma ba nia. Agora haʼu hatene katak ó-nia fiar boot tebes mai haʼu, tanba ó prontu atu fó ó-nia oan, ó-nia oan mesak, mai haʼu.’

Haree toʼok, Abraão iha fiar boot tebes ba Maromak! Nia fiar katak la iha buat ida neʼebé Jeová la bele halo, no katak Jeová bele halo moris fali Isaac husi mate. Maibé tuir loloos, laʼós Maromak nia hakarak atu Abraão oho Isaac. Tan neʼe, Maromak halo bibi ida kaʼit iha ai, no haruka Abraão atu fó bibi neʼe, laʼós nia oan, nuʼudar sakrifísiu.