NORORA Iburahimu ekyarukukora hanu? Aine omuhyo nikizooka nagenda kwita mutabani we. Habwaki nasobora kukora ekintu nk’eki? Okubanza, katurole nkoku Iburahimu na Sara batungiremu omwana.

Ijuka, Ruhanga akabaraganiza ngu nibaija kutunga omwana. Kikazooka nk’ekigumire muno, habw’okuba Iburahimu na Sara bakaba bakuzire muno. Kyonka Iburahimu akaba naikiriza ngu Ruhanga nasobora kukora ebi ebyaali nibizooka okuba ebitarukusoboka. Kiki ekyabaireho?

Hakahinguraho omwaka gumu kuruga Ruhanga araganiza. Hanyuma ya Iburahimu kuhikya emyaka 100 na Sara emyaka 90 ey’obukuru, bakazaara omwana ow’obwojo ou barukire Isaka. Ruhanga akaba ahikiriize omurago gwe!

Hanyuma ya Isaka kukura, Yahwe akalengesa okwikiriza kwa Iburahimu. Akamweeta: “Iburahimu!” Na Iburahimu yagarukamu ati: “Dora nyowe.” Hanyuma Ruhanga akamugamba ati: ‘Twara hati Isaka, omwana waawe wenka ow’ogonza, genda ha rusozi oru ndakwoleka. Obu orahikayo omwite omuheyo nk’ekihongwa.’

Ebigambo binu kabikatuntuza muno Iburahimu, habwokuba akaba nagonza muno omwana we. Kandi ijuka Ruhanga akaba araganize Iburahimu ngu abajukuru be nubo bakwikaire omu nsi ya Kanani. Kandi hati kyakusobokere kita kakuba Isaka aba afiire? Nobu Iburahimu araaba atarakyetegereze kurungi, baitu akorobera Ruhanga.

Obu yahikiire ha rusozi, Iburahimu akasiba Isaka yamuta ha kyoto ekyakaba akozire. Yaihayo omuhyo, kwita omwana we. Baitu mu kaanya ako, Maraika wa Ruhanga akamweta ati: ‘Iburahimu, Iburahimu!’ Na Iburahimu yagarukamu at: ‘Dora nyowe!’

Ruhanga akagamba ati: ‘Otateeka omukono gwawe ha mwojo kandi otamukora kubi. Hati manyire notiina Ruhanga habwokuba tonyimire omwana wawe omu wenka.’

Oku kakukaba kwikiriza kw’amaani Iburahimu okwakaba aine omuli Ruhanga! Akaba naikiriza ngu busaho ekirukulema Yahwe. Kandi akaba namanya ngu Yahwe yakuhumbwire Isaka kuruga mubafu. Baitu kitabe kigendererwa kya Ruhanga Iburahimu kwita Isaka. Mananu Ruhanga akaleetera empaya y’entaama kukwatira omu kisaka. Nukwo Ruhanga yagambire Iburahimu ngu agihonge mukiikaro ky’omutabani we.