OVE hẽ o tẽla oku limbuka eci Avirahama ayongola oku linga? Eye o kuete omoko peka kuenje ci molẽha okuti, oyongola oku ponda omõlaye. Momo lie? Tete tu konomuisi ndomo eye lukãi waye va cita omõla waco.

Suku wa likuminyile okuti ovo va ka kuata omõla. Omo okuti, kotembo yaco Avirahama la Sara va kukile ale, ka ca lelukile oku tava kondaka yaco. Pole Avirahama wa kolelele okuti Suku oka tẽlisa ondaka yaco. Nye ceya oku pita?

Noke lioku tambula ohuminyo yaco ku Suku va pita vali anyamo alua. Eci Avirahama a kuata 100 kanyamo okuti otembo yaco Sarai o kuete 90 kanyamo, oco va cita omõlavo Isake. Suku wa tẽlisa ohuminyo yaye.

Eci Isake a kula, Yehova wa seteka ekolelo lia Avirahama. Yehova wo vilikiya kuenje Avirahama wa kumbulula hati: ‘Amilo.’ Noke Suku wo sapuila hati: ‘Kuende lomõla wove wongunga, Isake kilu liomunda yimue hu tukuila. Ka ponde omõlove okuti o linga ocilumba.’

Olondaka evi, via sumuisile calua Avirahama momo eye wa solele calua omõlaye. Handi vali, Yehova wa likuminyile Avirahama okuti omãla vaye va ka tunga vofeka yo Kanana. Oco hẽ, ndamupi ohuminyo yaco nda ya tẽlisiwa lokufa kua Isake? Ndaño okuti Avirahama ka kuatele elomboloko liaco, pole wa pokola kondaka ya Suku.

Eci Avirahama a pitila komunda yaco wa tunga utala. Noke wa kuta omõlaye Isake, wo langeka kutala kilu liolohui. Kuenje wa nyañula omoko oco a ipaye omõlaye. Vepuluvi liaco, omunga ya Suku kilu yo vilikiya yiti, ‘Avirahama, Avirahama.’ Eye wa kumbulula hati: ‘Amilo.’

Suku wo sapuila hati: ‘Ku koluĩle eka liove komõla. Ku ko linge vali cimue. Cilo nda limbuka okuti ove o kuete ekolelo momo kua nimĩlile omõlove wongunga.’

Avirahama wa kuatele ekolelo liocili ku Suku. Eye wa kũlĩhile okuti Yehova o pondola oku linga ovina viosi kuenda oku pindula omõlaye Isake ko kufa. Pole, Suku ka kuatele onjongole yoku ponda Isake. Suku wa linga ocikomo coku eca okameme ku Avirahama. Eci Avirahama a petula ovaso aye, wa mola ocitupi comeme pokati kovisapa. Noke wa ci kuata kuenje wa ci lumba ndocilumba coku piñanya pomangu yomõlaye.