Mwaha 14: Muluku Onneehererya Waamini Wa Abrahamu
NYUWO munniwerya woona yeeyo Abrahamu enivara awe va? Owo orina mwaalo, nto vankhala ntoko wi owo onrowa omwiiva mwanawe. Nthowa xeeni owo aarowa awe tthiri opaka eyo? Wanipacerya, nrowee niwehee moota Abrahamu ni Sara samphwannya aya mwanaya.
Muupuweleleke, Muluku aahaamanela natiri wira yaarowa okhalana mwaana mwaamulopwana. Masi eyo yaakhala ntoko yoohiweryaneya, nthowa noowi Abrahamu ni Sara yaari oowuuluvalexa. Hataa vari siiso, Abrahamu, aahikupali wi Muluku anwerya opaka yeele yaakhala ntoko yoohiweryaneya. Siiso exeeni yiiranen’ye?
Vattuli va Muluku ommana natiri awe, aahimala mwaakha ntero. Nto, vaavo Abrahamu aarinaawe iyaakha 100 ni Sara iyaakha 90, awo yaahikhalana mwaana mwaamulopwana iihaniwa Isakhi. Muluku aahimwaakhwaniherya natiri awe!
Masi vaavo Isakhi vannunwa awe, Yehova aaheehererya waamini wa Abrahamu. Owo aahimwiitthana iiraka: ‘Abrahamu!’ Nto Abrahamu aahaakhula wira: ‘Miyo va!’ Nuumala vo Muluku aahihimya wira: ‘Mmukuxe mwaninyu, mwaninyu mmoseene, Isakhi, nto mmurowane va mwaako onrowaaka owooniheryani. Iwee mwamwiive mwaninyu ni munvahe owo ntoko mukuttho.’
Moota yaamuriipinha aya murima Abrahamu masuu awo, okhala wira Abrahamu aanimphenta vanceene mwanawe. Muupuweleke nto, Muluku aahimmana natiri oowi anamwane a Abrahamu yaarowa okhala elapo ya oKanani. Masi eyo yaarowa wiiraneya sai vaakhanleke wira Isakhi aamookhwa? Abrahamu khiiwexenxe, masi hataa vaari siiso aahimwiiwelela Muluku.
Vaavo owo vaaphiiya awe omwaako, Abrahamu aahimutthukwa Isakhi ni omuhela va altari yoowo aamutenka awe. Nuumala vo aahikumiha mwaalo wira omwiive mwanawe. Masi okathi ene yoole nlaikha na Muluku naahimwiitthana: ‘Abrahamu, Abrahamu!’ Nto Abrahamu aahaakhula wira: ‘Miyo va!’
‘Muhinvulalihe mmiravo owo aahiiso omwiiriha etthu ekina,’ Muluku aahihimya. ‘Vano miyo koosuwela wira nyuwo mookhalana waamini wa miyo, okhala wira khimmukhoottinhe mwaninyu, mmoseene, wa miyo.’
Waamini wuulupale wowiira sai waarina awe Abrahamu wa Muluku! Owo aakupali wi khiivo yaarowa okhala yoohiweryaneya wa Yehova, nto Yehova anwerya hataa onvenxa Isakhi mwaalipa-ookhwa. Masi ela khiyaari tthiri yoophavela ya Muluku wira Abrahamu omwiive Isakhi. Siiso Muluku aahiiriha wi epwittipwitthi ephare vamwirini mukina oowaattamela vale, nto aahimuleela Abrahamu wira ovahee mukuttho mmapuro mwa mwanawe.
Maphattuwelo 21:1-7; 22:1-18.
Makoho
- Natiri xeeni Muluku ampakenlya awe Abrahamu, nto Muluku aamwaakhwanihenrye sai natiri awe?
- Ntoko sooniheriwa aya valataratoni, Muluku eeherenrye sai waamini wa Abrahamu?
- Abrahamu aapanke exeeni, hataa ahiiwexenxe nthowa naya Muluku vaalamunlya awe ele?
- Exeeni yiiranen’ye vaavo Abrahamu vaakuminha awe mwaalo wira omwiive mwanawe?
- Olipa waya nroromelo na Abrahamu wa Muluku naari sai?
- Exeeni Muluku yanvanha awe Abrahamu wira opake mukuttho, nto yiiranen’ye sai?
Makoho oowuncererya
- Musome Maphattuwelo 21:1-7.
Nthowa xeeni Abrahamu aamuthikinlya awe mwanawe nihiku na neethanu neeraru? (Maph 17:10-12; 21:4)
- Musome Maphattuwelo 22:1-18.
Moota xeeni Isakhi oonihenrya awe omwiiwelela tiithi awe, Abrahamu, ni moota xeeni ela yaathoonyerya aya yoowiiraneya yuulupale ya muhoolo? (Maph 22:7-9; 1 aKor 5:7; aFil 2:8, 9)
You May Also Like
MUTAKIHEKE WAAMINI WAYA
Abrahamu
Moota xeeni Abrahamu aaryaawe oowaamini?
