ANA akuyiwona yakutenda Abulahamu apano? Jwalakwe ajigele cipula, soni akuwoneka kuti akusaka kuwulaga mwanagwe. Ana ligongo cici jwalakwe akusaka kutenda yeleyi? Candanda, kwende tulole kaje yayatendekwe kuti Abulahamu ni Sala ampate mwanace.

Akumbucile kuti, Mlungu ŵatesile cilanganono ni jemanjaji kuti cacikola mwanace jwamlume. Nambo yeleyi yawonekaga kuŵa yangakomboleka, ligongo Abulahamu ni Sala ŵaliji ali akalambele mnope. Nambope Abulahamu ŵakulupililaga kuti Mlungu komboleka kutenda yindu yakuwoneka kuŵa yangakomboleka. Ana sambano kaneko catendekwe cici?

Camasile caka camtundu Mlungu ali atesile cilanganonoci. Sambano Abulahamu ali akwete yaka 100, ŵamkwakwe 90, ŵaŵelece mwanace jwamlume juŵamkolasile lina lyakuti Isaki. Mlungu ŵakwanilisye cilanganono cakwe!

Nambo Isaki paŵakusile, Yehofa ŵalinjile cikulupi ca Abulahamu. Ŵam’ŵilasile acitiji: ‘Abulahamu!’ Soni Abulahamu ŵajanjile kuti: ‘Ndili apano!’ Ni Mlungu ŵatite: ‘Mjigale mwanagwenu jumopejo, Isaki, ni mjawule najo kwitumbi lyacinamlosye. Kweleko mkam’wulaje mwanagwenu, ni mkampelece mbopesi.’

Abulahamu paŵapikene maloŵego camkamwile canasa mnope, ligongo ŵamnonyelaga mnope mwanace jwakwejo. Akumbucile kuti Mlungu ŵalangene kuti ŵanace ŵa Abulahamu cacitamaga m’cilambo ca Kanani. Nambo ana yeleyi yikakombolece catuli naga Isaki akawe? Abulahamu nganayipikanicisya, nambope jwalakwe ŵapikanile Mlungu.

Paŵayice kwitumbiko, Abulahamu ŵamtaŵile Isaki, ni kum’ŵika pakupelecela mbopesi paŵataŵile. Kaneko ŵakopwesye cipula kuti am’wulaje mwanagwawojo. Nambo pakatema kakoko lilayika lya Mlungu lyam’ŵilasile kuti: ‘Abulahamu, Abulahamu!’ Abulahamujo ŵajanjile kuti: ‘Ndili apano!’

Mlungu ŵatite: ‘Mkasimum’wulasya mwanacejo kapena kutenda kandu kalikose kwa jwalakwe. Sambano manyilile kuti mkwete cikulupi mwa une, ligongo nganimunganya mwanagwenu jumopejo.’

Abulahamu ŵakwete cikulupi cekulungwa mnope mwa Mlungu! Jwalakwe ŵakulupililaga kuti pangali cakumlema Yehofa, soni kuti Yehofa akakombolece kumjimusya Isaki ku ŵawe. Nambo ngaŵaga kuti lyaliji lisosa lisyesyene lya Mlungu kuti Abulahamu am’wulaje Isaki. Ni Mlungu ŵatendekasisye kuti ngondolo jitanjile m’mawukutu gagaliji pakuŵandika, ni ŵamsalile Abulahamu kuti ajipelece ngondolojo mbopesi mmalo mwa mwanagwawojo.