LOT en sy gesin het saam met Abraham in die land Kanaän gewoon. Eendag het Abraham vir Lot gesê: ‘Daar is nie genoeg land hier vir al ons diere nie. Laat ons asseblief uitmekaargaan. As jy in een rigting gaan, sal ek in die ander rigting gaan.’

Lot het oor die land uitgekyk. Hy het ’n baie mooi deel van die land gesien wat water en oorgenoeg goeie gras vir sy diere gehad het. Dit was die Jordaanstreek. Toe het Lot met sy gesin en diere soontoe getrek. Hulle het eindelik in die stad Sodom gaan woon.

Die mense van Sodom was baie sleg. Dit het Lot ontstel, want hy was ’n goeie man. God was ook ontsteld. Uiteindelik het God twee engele gestuur om Lot te waarsku dat hy Sodom en die nabygeleë stad Gomorʹra gaan vernietig omdat hulle so sleg was.

Die engele het vir Lot gesê: ‘Maak gou! Neem jou vrou en jou twee dogters en gaan uit hierdie plek uit!’ Lot en sy gesin was ’n bietjie stadig, en daarom het die engele hulle aan die hand gevat en uit die stad gelei. Toe het een van die engele gesê: ‘Vlug vir julle lewe! Moenie omkyk nie. Vlug na die berge sodat julle nie doodgaan nie.’

Lot en sy dogters was gehoorsaam en het van Sodom af weggevlug. Hulle het nie vir ’n oomblik gestop nie, en hulle het nie omgekyk nie. Maar Lot se vrou was ongehoorsaam. ’n Ent buite Sodom het sy gaan staan en omgekyk. Toe het Lot se vrou ’n soutpilaar geword. Kan jy haar in die prent sien?

Ons kan ’n goeie les hieruit leer. Dit wys vir ons dat God die mense red wat aan hom gehoorsaam is, maar dié wat aan hom ongehoorsaam is, sal hulle lewe verloor.