Maana 15nan

Lɔti muso y’a kɔfilɛ

LƆTI ni a ka denbaya ani Ibrahima tun sigilen bɛ yɔrɔ kelen na Kanan jamana na. Don dɔ, Ibrahima ko Lɔti ma: ‘Yɔrɔ ka dɔgɔ an ka baganw bɛɛ lajɛlen ma. An ka mabɔ ɲɔgɔn na. N’i taara fan dɔ fɛ, ne bɛ taa fan dɔ wɛrɛ fɛ.’

Lɔti y’a ɲɛkɔrɔta ka jamana bɛɛ filɛ . A ye yɔrɔ dɔ ye min cɛ ka ɲi kosɛbɛ. Ji ka ca ani baganw ka bin ɲuman caman fana bɛ a yɔrɔ la. O yɔrɔ tun ye Jurdɛn dugukolo ye. O la sa, Lɔti ni a ka denbaya ni a ka baganw taara yen. U labanna k’u sigi dugu dɔ kɔnɔ min tɔgɔ ye ko Sodɔmɛ.

Mɔgɔ minnu tun bɛ Sodɔmɛ, olu tun ka jugu kosɛbɛ. O ye Lɔti dusu kasi kosɛbɛ, bawo Lɔti tun ye mɔgɔ ɲuman ye. O ko ye Ala fana dusu kasi  kosɛbɛ. A laban na, Ala ye mɛlɛkɛ fila ci k’a fɔ Lɔti ye ko a bɛna Sodɔmɛ ni a kɛrɛfɛ dugu Gomɔrɛ halaki u ka juguya kosɔn.

Mɛlɛkɛw y’a fɔ Lɔti ye ko: ‘I teliya! I muso ni i denmuso fila ta. Aw ka taa ka bɔ yan!’ Lɔti n’a ka denbaya tun bɛ ka u sumaya minkɛ, mɛlɛkɛw ye u bolo minɛ ka bɔ ni u ye dugu kɔfɛ. O kɔ, mɛlɛkɛ kelen ko: ‘Aw ye boli ka aw niw kisi! Aw kana aw kɔfilɛ. Aw ye boli ka taa kuluw kan walisa aw kana faga.’

Lɔti ni a denmusow ye mɛlɛkɛ ka kuma mɛn. U bolila ka u yɔrɔ janya Sodɔmɛ dugu la. U ma u jɔ hali dɔɔnin, u ma u kɔfilɛ fana. Nka, Lɔti muso ma sɔn ka mɛlɛkɛ ka kuma mɛn. U bolilen ka se yɔrɔ dɔ la, Lɔti muso y’a jɔ, k’a kɔfilɛ. O yɔrɔnin bɛɛ la, a kɛra kɔgɔkuru ye. I ɲɛ bɛ a la yan ja kan wa?

An bɛ se ka kalan ɲɛnama sɔrɔ nin maana na. A b’a jira an na ko mɔgɔ minnu bɛ Ala ka kuma mɛn, Ala bɛ olu de kisi. Nka, mɔgɔ minnu b’u ban Ala ka kuma ma, olu de bɛ bɔnɛ u niw la.

Jenɛse 13:​5-13; 18:​20-33; 19:​1-29; Luka 17:​28-32; 2 Piɛrɛ 2:​6-8.