LOT le a innchungkhar cu Abraham sin ah Kanaan ram ah an rak um ve. Nikhat cu Abraham nih Lot sin ah cun: ‘Kan saṭil caah hika hmun hi a bi tuk. Zangfahnak in i ṭhen ko u sih. Nangmah khatlei na kal ah cun keimah a dang khatlei ka kal ve lai,’ tiah a rak ti.

Cu tik ah Lot nih ram cu a zoh i, ti zong a tam i, a saṭil caah ramhring a ṭhatnak hmun kha a rak hmuh. Cucu Jordan District a si. Cucaah Lot nih a innchungkhar le a saṭil cu cuka lei ah cun a rak i ṭhialpi hna. A donghnak ah Sodom khuapi ah khan umhmun an khuar.

Sodom khua mi hna cu an rak ṭha lo ngaingai. Mah nih cun Lot cu a lung a rak fah ter ngaingai, zeicahtiah amah cu mi ṭha a rak si. Pathian zong a lung a rak fak ve. A donghnak ah cun, Pathian nih a vancungmi pahnih kha Sodom le a pawng i Gomorrah khua kha an ṭhat lo tuk caah ka hrawh hna lai tiah Lot kha ralrin a run pek ter hna.

Vancungmi nih cun Lot cu: ‘I hnawh tuah u! Na nupi le na fanu pahnih kha la hna law hi hmun hin chuak tuah u!’ tiah an rak ti. Lot le a innchungkhar cu chuah awk ah an khul a rak nuar deuh i, cucaah vancungmi hna nih an kut in an hnuh hna i khua leng ah khan an chuahpi hna. Cun vancungmi pakhat nih: ‘Nan nun nak hnga tli u! Hnulei zoh hlah u. Tlang ah tli u law nan thi lai lo,’ tiah a rak ti hna.

Lot le a fanule nih cun an rak ngaih i Sodom khua in an chuak. Tlawmpal hmanh an rak i din lo. Hnulei zong an zoh ṭhan lo. Sihmanhsehlaw Lot nupi cu a rak ngai lo. Sodom khua in hla nawn an kal hnu ah a dir i hnulei a rak zoh ṭhan. Cutikah Lot nupi cu cite tung ah a cang. Hmanthlak chung ah hin amah cu nan hmu maw?

Hi thawng in fimnak pakhat kan i lak khawh. Pathian nih amah bia a ngai mi cu a khamh hna nain a bia a ngai lo mi hna cu an nunnak an sung lai.