LOT ye ubon esie ẹkedụn̄ ọtọkiet ye Abraham ke isọn̄ Caʹnaan. Usen kiet Abraham ama ọdọhọ Lot ete: ‘Isọn̄ mi ikemke kpukpru mme unam nnyịn. Mbọk yak nnyịn idianade. Edieke afo akade n̄kan̄ kiet, ami nyeka n̄kan̄ eken.’

Lot ama ese ofụri isọn̄. Enye ama okụt ata ediye ubak obio oro enyenede mmọn̄ ye ediwak mbiet ọfọnde ọnọ mme unam. Emi ekedi unaisọn̄ Jordan. Ntre Lot ama ada ubon esie ye mme unam ọnyọn̄ do. Mmọ ke akpatre ẹma ẹnam obio Sodʹom ebietidụn̄ mmọ.

Mbon Sodʹom ẹma ẹnen̄ede ẹdiọk. Emi ama afịna Lot koro enye ekedi eti owo. Ama afịna Abasi n̄ko. Ke akpatre, Abasi ama ọdọn̄ angel iba ẹketọt Lot ete ke imo iyesobo Sodʹom ye n̄kpet n̄kpet obio Go·morʹrah ke ntak idiọk mmọ.

Mme angel ẹkedọhọ Lot: ‘Sọp! Da n̄wan fo ye nditọ iban fo iba ndien wọrọ ke ebiet emi!’ Lot ye ubon esie ẹma ẹduọn esịt ndiwọrọ, ntre mme angel oro ẹmụm mmọ ke ubọk ẹda ẹwọrọ ke obio. Ndien kiet ke otu mme angel ọkọdọhọ: ‘Ẹfehe ẹban̄a uwem mbufo! Ẹkuse edem. Ẹfehe ẹka mme obot, mbak ẹdiwot mbufo.’

Lot ye nditọ iban esie ẹma ẹkop uyo ẹnyụn̄ efen̄e ẹkpọn̄ Sodʹom. Mmọ ikatuakke ida ndomo esisịt, ikonyụn̄ isehe edem. Edi n̄wan Lot ama otụt utọn̄. Ke mmọ ẹma ẹkekpọn̄ Sodʹom esịt, enye ama atuak ada onyụn̄ ese edem. Do n̄wan Lot ama akabade adaha inụn̄. Nte emekeme ndikụt enye ke ndise?

Nnyịn imekeme ndikpep eti ukpepn̄kpọ nto emi. Owụt nnyịn ete Abasi anyan̄a mmọ oro ẹkopde uyo esie, edi mmọ oro mikopke uyo esie ẹyeduọk uwem mmọ.