RATOU a tiko vata kei Eparama o Loti kei na nona vuvale mai Kenani. Dua na siga a kaya vei Loti o Eparama: ‘Sa lailai mai na vanua mera tiko kina na nodaru manumanu. Yalovinaka me daru sa tawase mada. Ke o lako ina imatau, au na lako ina imawi.’

Vakararai vanua sara o Loti. Raica rawa o koya e dua na tiki ni vanua vinaka e tu kina na wai kei na veico me kedra nona manumanu. Oqo na yasana ina Joritani. Mani toki iratou sara kina na nona vuvale kei na nona manumanu. Ratou lai tiko sara ena koro o Sotoma.

Era ca na kai Sotoma, qai vakararawataki Loti dina ni tamata vinaka. E rarawa tale ga kina na Kalou. Sa qai tala yani e rua na agilosi na Kalou me tukuna vei Loti ni sa vakarau vakarusai Sotoma kei na koro e volekata, o Komora baleta nira dau cakava na veika ca.

Rau kaya vei Loti na agilosi: ‘Vakatotolo! Lako tani e ke, kauta na watimu kei rau na luvemu yalewa!’ A kauti iratou yani vakatotolo na agilosi ina taudaku ni koro ni sa rui berabera nodratou toso. Sa qai kaya vei Loti e dua vei rau na agilosi: ‘Dro mo bula! Kua tale ni raivuki. Dro ina veidelana, mo kua ni mate.’

A talairawarawa o Loti kei rau na luvena ni ratou dro tani mai Sotoma. Sega tale ni ratou tu vakadua se raivuki. Ia a talaidredre na wati Loti ni rai tale i muri ni se bera ni yawa na vanua eratou lakova. Mani duru masima kina. O raici koya ena iyaloyalo?

Eda vulica e ke e dua na lesoni vinaka. E vakaraitaka vei keda ni Kalou ena vakabulai ira ga na talairawarawa vua, ia o ira na talaidredre era na mate.