Omukazendu waLot wa taviza kongotwe
EHUNGI 15
Omukazendu waLot wa taviza kongotwe
LOT neṱunḓu re va turire puna Abraham mehi raKanaan. Eyuva rimwe Abraham wa tjere ku Lot: ‘Imba kapena ehi nda yenena kovinamwinyo vyetu avihe. Arikana, ngatu haṋike. Indu ove tji wa i munda umwe, ami me i kuwarwe.’
Lot wa tara kombanda yehi na munu oruveze oruwa rwehi mu mwa ri nomeva, nehozu ewa kovinamuinyo vye. Indwi rwa ri orukondwa rwaJordan. Okuzambo Lot wa tjindira ngo neṱunḓu re novinamuinyo vye. Korusenina va katura motjihuro tjaSodom.
Ovandu vaSodom va ri ovavi tjinene. Ihi tja pindikisa Lot mena rokutja, eye wa ri omurumendu omuwa. Mukuru wina wa pindikire. Korusenina Mukuru wa tuma ovaengeli vevari okukarakiza Lot kutja Eye ma yandeke Sodom notjihuro tjopopezu Gomora mena rouvi wavyo.
Ovaengeli va raera Lot: ‘Hakahana!’ Toora omukazendu woye novasukona woye nu u pite mwi!’ Lot neṱunḓu re aave kambura orure kaṱiṱi, okutja ovaengeli ve ve kambura komake nave ve pitisa motjihuro. Okuzambo umwe wovaengeli wa tjere: ‘Tupukeye mena romiinyo vyeṋu! Amu taviza kombunda. Tupukeye kozondundu, kokutja amu ha ṱu.’
Lot novasukona ve va puratena nu va tupuka okuzamo mu Sodom. Owo kave na pu va kurama nandarire kaṱiṱi, nowo kave na pu va taviza kombunda. Nungwari omukazendu waLot kari nonḓuviro. Kombunda ya indu tjiva pita omukato omusupi okuza mu Sodom, eye wa kurama na taviza kongotwe. Okuzambo omukazendu waLot wa rira otjitundu tjomongwa. Ove mo mu munu motjiperendero?
Ehongwa riṋe ewa ndi matu rihongere ko ku imbi? Matu rihongo kutja Mukuru u yama imba mbe nonḓuviro ku Ye, nungwari imba mbe hi nonḓuviro ku Ye mave pandjara omiinyo vyawo.
Genesis 13:5-13; 18:20-33; 19:1-29; Lukas 17:28-32; 2 Petrus 2:6-8.
